Srimska Mitrovica - Nacionalne šveto

 

Отримана схадзка Орґанизацийного одбору за означованє националного швета
У парохиї Вознесеня Господнього у Сримскей Митровици всоботу, 10. новембра, отримана схадзка Орґанизацийного одбору централней манифестациї за означованє Националного швета Руснацох, 19. януара 2013. року у тим городзе.

Предсидатель Орґанизацийного одбору, о.д. директора Заводу за културу войводянских Руснацох Янко Бучко представел косцанїк преслави, хтору буду твориц Шветочна академия од 20 г. у Театру “Добрица Милутинович”, а пред тим, на 19 г., у Музею Сриму будзе отворена вистава “Руснаци на старих фотоґрафийох” и вистава малюнкох уметнїкох Руснацох з Митровици.

Декан беоґрадски и парох у Сримскей Митровици о. Владислав Варґа представел духовну часц означованю швета, дзе централне место будзе мац Архиєрейска служба Божа на 17 г., хтору будзе предводзиц апостолски еґзарх за грекокатолїкох у Сербиї и Чарней гори кир Георгий Джуджар, зоз сослужованьом священїкох з нашого Еґзархату.

Пред тим, у парохийней сали будзе вистава молитвенїкох, портретох парохох и прдметох хтори ше хаснує у богослуженьох, як и вистава старих руских єдлох.

Попри членох Орґанизацийного одбору зоз Сримскей Митровици, на схадзки присуствовали предсидатель Вивершного орґану Националного совиту (НС) Руснацох Йовґен Мудри, член НС зоз Сримскей Митровици др Мирослав Бесерменї, як и декан сримски и парох у Шидзе о. Михайло Режак.

(конец) влдї