Stanovisko Svetovej rady Rusínov

Дня 15. децембра 2007 року „Сойм Подкарпатських Русинов“ опубліковав Декларацію вєдно з Преамбулов і Дадатком, котрый має назву „К 62 годовщине І съезда народных комитетов празднование ... акта анексии?“.

Світова рада Русинів поважує вшыткы тоты документы за небезпечну провокацію, заміряну проти екзістуючіій політічній сітуації в Европі і інтересів карпаторусиньского народа, што жыє на Українї (в Закарпатьскій области) і сусіднїх державах.

У высше спомянутых документах Сойм ся выголошує за “народный парламент“ а в преамбулї і декларації ся твердить, же Україна не має „леґітімне“ право на справованя Закарпатя; же почас шістнадцятёх років Україна робить політіку „скрытой ґеноціды русиньского народу“, же на Закарпатю екзістує реална грозьба етнічного конфлікту, і же Росію і Европска Унія мусять взяти на себе функцію ґарантів у дїлї вырішіня „русиньского проблему“.

Треба ся позвідати, хто зволив Сойм, котрый ся выголосив за „народный парламент„? Одповідь: нихто!

А што повісти ку грозьбі ґетоціды? Теперь на Закарпатю выходять друкованы русиньскоязычны публікації, екзістують школьскы класы (в котрых ся учіть коло 900 школярів русиньскый язык), леґално функціонують русиньскы сполоченьскы і културны орґанізації, в тім чіслї ай тоты, што суть членами Сойму. Жадна особа не пришла о свій жывот, не была арештована зато, же ся голосить як Русин. Тоты, што одышли зо Закарпатя і суть подля походжіня Русины, стали ся челныма штатныма представителями теперішнёй Україны, в єй владї і верховнім судї. Также о якій „грозьбі ґеноціды“ є реч?

Далшы „арґументы“ Сойму о провдоподобности ці неминучости взнику етнічного конфлікту на Закартатї вызерають просто абсурдно і птротиречать вшыткій історічній і сучасній скусености мірного і гармонічного сполужытя Русинів зо своїма сусідами іншой націоналности. Будь-якы речі о можности міджіетнічного конфлікту суть уражков русиньского народу, оддавна знамого своёв толератностёв і почливостёв к людём іншого націоналного походжіня ці говорячіх іншым языком.

Росія як ґарант вырішіня русиньского вопросу? То звучіть просто смішно, бо хто в Европі буде поважовати авторітарный режім той державы на челї з презідентом Путіном за скуточного ґаранта охраны людьскых прав і демокрації? Сучасный російскый режім, як і ёго совётьскый предходця, ці може ся поважовати за добрый приклад вартый наслїдованя про карпатьскых Русинів ці іншый народ в Европі. Позераючі на теперішню політічну сітуацію коло незалежной Україны, вызвы о поміч з боку Росії (а іщі в документах опублікованых у російскім языку) вызерають як умыселна провокація Сойму проти влады країны, де ёго члены жыють і роблять.

Обсяг Додатку ку Декларації і Преамбулї застрашує іщі веце. Їх авторы выголошують „косовскый сценарь“ як єдиный выход про Закарпатя. В нім ся вызывать ку створіню „суверенного штату“, котрый не може быти „частёв другого штату“. Тот штат на Закарпатю мусить мати свою армаду і выбудовати „Велику Карпатьску Стїну“, котра бы їх оддїлёвала од остатной Україны; прияти русиньскый і російскый (!) язык як державны. Наконець, обчанство (громадянство) будучого „суверенного“ Закарпатя буде „зарезервоване про корінне жытельство і людей звязаных свадьбов“. А як ся тота корінность буде скумати? Автор додатку пропонує створити лустрачну комісію, яка буде штудовати походжіня каждой особы перед тым, як ся вызначіть, ці єй предкы жыли на Закарпатю найменше почас штирёх поколїнь. Можно Сойм мав бы повірити тоту „лустрачну комісію“, жебы робила іщі ай аналізу кровли каждого індівідуа?

Подобны пропозіції одзеркалюють тоталітны, расістічны і фашістічны ідеї, котры суть неприятельны про Европу 21. стороча ани інде у світї.

В сучасній посткомуністічній Европі окремы особы і орґанізації, выужываючі слободу слова, можуть высловлёвати будь-якы ідеї, аж по тоты найрадікалнїшы і найвеце екстремістічны. „Сойм Подкарпатських Русинов“ тыж має тото право. Неприятельным але є факт, же даны документы были підписаны членом Світовой рады Русинів.

Світова рада Русинів катеґорічно ся діштанцує од екстремістічного обсягу Декларації, Преамбулы і Додатку, котры были опублікованы „Соймом Подкарпатських Русинов“ 15. децембра 2007 року. Світова рада Русинів ставить перед собов ціль выяснити, ці высше спомянуты документы были схвалены вшыткыма орґанізаціями, што суть членами Сойму, або лем тыма орґанізаціями, председове котрых дали свій підпис під Декларацію. По даню даной інформації Світова рада Русинів дасть на посуджіня, ці Сойм може дале заступляти Русинів Україны у Світовім конґресі Русинів.

Проф. Др. Павел Роберт Маґочій,
председа Світовой рады Русинів

Букурешт, 5.2.2008