Štefan Suchyj: Iz Christovoj molodosty

Із Хрістовой молодости
 
Добру вість чуйте наново
з молодости Ісусовой!
Родічі а Ісус з нима
Ішли до Єрусалима,
бы святи Пасхы дати честь...
Така історія в тім єсть.
Кідь йшли назад по неділи,
сына никде не виділи
й вернули ся зясь до міста
найти страченого Хріста.
„Што-сь нам то учінив, сыне,
з страху кров нам в жьілах стыне,
мы перейшли Єрусалим,
но ньит тя уже третій день!"
Ці вы не знали, же я ту
воздавам честь свому Отцю
у єрусалимскім храмі
із умныма старшинами?"
В тых словах Йосиф і Mарія
не нашли порозумліня,
но прецінь ся у них скрывав
тот змысел, што їм Господь дав.
А потім на ріці Йордан
ізявив ся святый Іоан.
Жыдiв хырстив він водами,
том Хрестительом го звали.
Жывив ця медом лісных пчіл
і лучных коників він їв.
Народ простый го вознашать
й наставлять за Месіяша.
„Ту я вас хрещу водoв днесь,
но меджі нами такы єсть,-
Духом Святым похырстить вас,
но полову спалити дасть!"
Тоты слова суть приправов
про Хрістову страстну драгу.
По хрест водoв йде людей дость
а меджі нима і Хрістос.
„Вказав єм ся перeд тобoв,
бы єсь ня похырстив водoв!"
„Я мам похырстити того,
што од ня бівшый є намного?!"
„Вірь мі, є то воля божа!"
-й Іоан хрест му водoв вложать.
Кідь з воды выкрочів на суш,
над ним ся зявив Святый Дух,
на крылах гoлуба розквітло
правды божой ясне світло.
У ту хвілю со небеси
голос божый ся вознесе:
„Мій милованый сын є він,
я залюбліня маю в нім!"
Позад той зявы сорок днів
Iсуса Дух Святьій водив
в пустыни без перестаня,
бы прияв божське посланя.
Штиридцять днів він тримле піст,
не выпйе нич, ани не зйість,
до молитвы нурять духа,
йогo слова небо слухать.
В Хріста пустынну обітель
заходжать сам спокуситель...
Предкладать му зводны планы
заповзятый гость незваный,
бы камінь він змінив на хліб,
із вышав бы скочів на спід,
та Хрістова певна віра
вшыткы спокусы одбила.
„Сатане, так ся не стане,
бо в Законі написане:
Господу Богу свому служ,
ці єсь жена або муж!"
Одышов од Хріста сатан,
нерадостный своїм стратам,
но ты на то не забудь,
же доднесь спокушать люд.

Думай на то в ніч і вводни!
Чули сьме Слово Господнє!

Štefan Suchyj zo zbirky Azbukova mama (2010)