Štefan Suchyj: Jak jem perestal pyty

Як єм перестав пити

Не як перестав, но як одучів єм ся. Перестати значіть не пити на даякый час, але одучіти ся - то навсе перестати. А мы, Руснаци, ани перестати не годни, лем ся тримлеме того нашого перпетуум мобіле: Выпий, бо налляте, наллій, бо выпите і так до неконечности.

Но абы было ясно. Я ту не говорю о питю, але о пияцтві. Од коштованя алкоголів ся не треба одрікати, бо то є охудобньованя жывота. Нач помітовати даром од бога, кідь доктор не заказав? Але заливати ся тым даром - гріх, бо таке питя ті затопить духа, што помыгать чоловічіні мыслити о властнім його Я.

Кідь самолюбому хлoпови дахто - а щі ку тому кідь властна жена - розкаже, абы перестав льоґати, так го то наісто іщі веце за пoгариком потягне. Моя пішла на рік до Америкы, вшытко лежыть на моїх плечах, старостей мам повыше гoловы і не є никого, хто бы на мі чінив насиленство, присперав ня не іти до корчмы. Ньит прічіны, ани часу на хлопскы пества.

Словом, не мушу ся перед никым затинати: Ай нато піду!

Сьме мы даколи, як малы труцовиты діти. Не гварьте нам нич на тоты темы, домашні выхователькы нашы. Можно (праві зато) перестанеме самы од себе.

Повісте сі: А што буде потім, кідь ся му тота його домів верне? Я уж теперь знам, же то не залежыть лем од ньой. Лемже усвідомив єм сі то праві же без ньой.

Štefan Suchyj zo zbirky eseji: Most na rikov času
Vydal: Spolok rusyňskych pisateľiv (2009)