Štefan Suchyj: Sadovnyk to ťažke remeslo

Садовник то тяжкé ремесло

Бардзяччина Маня є єдиначков, якá ся по скінчіню учіліща выбрала на бріґаду до Швайцарьска. Служыла як варовничка дітéй у лотровскій албаньскій родині, котрá ся жывила розпрострáньованьом дроґ.

Її отéць Ігнáт Манько походжать із многодітньой фамелії із сусіднього валалу і хоць є в роках, все ся знає розсéрдити, кідь му дахто повість, же є присташ. Хлоп є то гырмный, вы стрямбав ся із бiды і знає ціну властной заможности. Мерзить го лем тото, же ту, де пристáв, нихто не повість, же йде до Манька, але лем все до Бардзячкы.

Але то нич, рішіня ся найде. Абы змінив властный імідж у валалі, надумав ся постáвити в зáгородці перед хыжов хрест, де на вічны вікы буде вырыте його мено Ігнáт Манько, котрый на Славу божу дав тот криж восстановити. Його планы му розметала дівка Маня.

На Маню із Швайцарьска пришло ознамліня, же ся там заподівала продаваньом дроґ, зато є взятá до арешту. Ганьба, як світ. Бардзяччина, властні Мáнькова Маня і у басох а щі ку тому про дроґы.

Ігнáт Манько ся перед властнов женов зарік, же властну дівку Маню не хоче уж видіти до смерти. О пару місяців прийшло із Швайцарьска друге ознамліня, же Маню заперли невинно, бо Албаньці ся згвáрили і фалечні проти ньой свідчіли. Маня ся вернула домів, але отéць ї з дому выгнав, бо же му ганьбы наробила.

Я є Ігнáт Манько. Походжу із дванáдцятеро сородженьців. влáстныма руками хыжу-м збудовáв і зарядив столярьску ділню, а єдина дівка ня ісклáмала. Єм гордый на то, што я доказáв, а хто є інакшый, так я такых побриньковачів не хочу видіти. Хоць ай мою властну і єдину дівку.

Бардзяччина Маня є шыковна, як її отéць, але сердце має мнягкé, як її баба мала, зато отцьови к народенинам послала із Чех красный стромик і літер свадьбовой пáлінкы, бо ся там оддалá.

А Ігнáт Манько з того не знає што робити. По першыраз у жывоті...

Кібы быв садовником, та бы знав, же молоде стромича треба привязовати ку тычці, бы го буря не зломила. Але садовник то тяжке ремесло.

Štefan Suchyj zo zbirky eseji: Most na rikov času
Vydal: Spolok rusyňskych pisateľiv (2009)