Štefan Suchyj: Slon na Kyčari

Слон на Кычарі

Што за чудо, што за чары?
Затрубiв слон на Кычарі,
Зъявив ся ту із Індії,
де робить в телевізії.
Mать намір світ облетіти
на балоні за пів літа.
Што хоче, ся просять ДІТИ.
Же засобы доповнити...

Нато жёны у валалі
обїднавкы гнедь дістали.
Голодный слон захотів
десять МІХІВ пирогів,
штирі котлы кеселиці,
фучок, грибів, тендерїці...
Гнедь збогатїли Руснаци
на слонячій турістїці.

I ся розшырили фамы,
же слон платив талярями.
(Кривы правды суть дачії,
бо то были лем рупії.)
Село старосту притйсло,
най слонови пошле письмо.
Він загнав му прязны слова,
же го ту чекають знова.

Не убiгло четверть рoка
й одповідь пришла коротка.
Істо мате добру страву,
выжывну і міцно здраву
і самьі сьте вы, Руснакы,
люди предобротной дякы.

Но мате стрільців неслушных
у зелeных губертусах.
На стріляня мають ґураж,
стрілили бы ня на ґуляш.
Вырубаны вашы лїсьі,
звірина ся у них дусить,
так нач вам щі трeба слона,
кoрмте своїх звірів дома.

Štefan Suchyj: Azbukova mama (2010)