Štefan Suchyj: Tajna večerja

Тайна вечеря

Чуйте о вечері тайній,
якый мала змысел й повод,
Ісусовій хвіли крайній,
кідь му сходжав земный жывот.
У Казяовім палаці,
Iсусовой смерти стройці
- фарісеї снують сіті,
як Спасителя зловити.
Він о зраді уже знає,
Петра з Яном посылає,
най баранка приобріють
на послідню то вечерю,
Iсус апостолім гварить:
"Mіцно-м тужив їсти з вами
великоднього баранка,
-велика є то памятка,-
бо уж їсти го не буду
аж до посліднього суду."
Як баранка скоштовали,
вина до чаш їм наляли.
Ту Учітель зясь і знова
ізявить пророцькы слова:
„Пийте ныні напій з грозна,
мою кров в нім каждый спознать.
Новозаконна кров то, люди,
што за вас проллята буде!"
Про вшыткых пак поділив хліб
й такыма словами прорік;
„Їджте го, то тіло моє,
што за вас ся офірує.
Так одныні до остатку
чіньте на мою памятку!"
Апостольскы мыcлі тішить
перти ся, хто з них є бівшьій.
Ту їм Iсус так предложить:
„Най великый малым служить!
О, господня мудростьо ты,
введь нам духа до доброты,
воізяв нам з вьюокостей
непохыбность твоїх мыслей."
Чудуйте ся теперь многы:
Ісус вшыткым вмывать ногы
й давать приклад покоріня
про хрістіан поколіня.
Петро не давать ся вмыти,
бо він Хріста тримле в чести:
„Вчітель, што мудростьов гойный,
мыти ногы не достойный!"
-взопре ся Петро тым словом
Iсусови поготово.
„Кідь я умыю ногы вам,
тым вам приклад братства дам.
Хто спохопив слово мое,
тот їх другому умыє.
Вера так будуть братами
вшыткы земны хрістіани.
Вера, вера, повідам вам:
Хто прийме тых, што-м їх послав,
тот чоловік мене прияв
а хто пак мене перевзяв,
сприйме го тот, што ня послав."
Через довгы так сторочя
іде памятка пророча.
Глядай правду у тім слові,
што Хрістос дав апостолам
на Тайній вечери з нима
край міста Єрусалима.
Затруб, трубо Ісусова,
і восхваль Господа Бога.
В тій славі чути малый стон,
-то Юда вышов з салы вон...

Дай нам, Спасе, сил наново!
Чули сьме Господнє Слово!

Štefan Suchyj: Azbukova mama (2010)