Štefan Suchyj: Vybir apostoliv Isusom Christom

Выбір апостолів Ісусом Хрістом

Ісус в лодьці скончів реч.
Смутны, же не вловили нич,
рыбарі прали в волнах сіті.
Він ласков смуток їх пристрітив.
Хрістос к Симкови ся озвав...
Же Петром буде, щі не знав.
„Намірь чалнок до глубшых вод
і збагнеш божой волі зрод!"
„То, Господе, збыточна річ,
бо сьме ловили цілу ніч,
та по рыбах ани сліду,
мы не вловили ни сдну.
Но кідь така твоя воля,
сіті спустиме до моря."
Так ся збыло, же в ту хвілю
 їх сіті ся наповнили,
аж Сімон впав на коліна
й перед Хрістoм ся сповідать:
„Хрісте, одыйть ты од ня" - рік -
„бо єм грішный чоловік."
„Ты єсь Симкo, сын Iоана,
 I ты певный будь гі тота скала.
Mено од ня Петро приймий
й намісто рыб ты лов людей!"
Наслідовав Хрістовы сліды
пак Філій з міста Бетсаїды
й щі того дня Натанаїл,
што під фіґoвником сидів.
Неодповїдженый вопрос
в очах вни мали й рік Хрістос:
„Бівшы ввйдите чудеса,
ай отворены небеса,
з них сила ангелів велика
зыйде к Сыну Чоловіка!"
Пак взрів Mатвія у пристани,
што быв выберачом даней.
„Наслідуй ня!" - Ісус повів
 і тот му волю уволив.
Фарісеїв тото діло
преукрутні роззлостило:
„Каждый з выберачів даней
все злодійству быв одданый.
Мож такому челяднику
дати довіру велику?!"
„Не мі є здравых лічіти,
лічу хворы божы діти,
І все добры суть не без надій,
бы ліпшы были - то ціль мій!"
Закoнникім так одповїв
й на горі ночов ся молив.
Рано учеників славив,
назвав їх апостолами.
він ку лічіню дав їм міць,
злых духів одвертати пріч.
„Кому за мнов іти треба,
най забуде сам на себе,
тот най тяжкый хрест бере,
най з ним наслідує мене.
Каждый з вас блаженный буде,
кiдь про ня побитый буде, 
про ня буде одшмаряный
й неправдиво огваряный.
Вы світьте так перед людми,
бы сьте їх вывели із тмы,
най скутків вашых голос взве ся 
на земли і на небесах!" 

І ты так ожывай одзнова!
Чули сьме Господні Слова!

Štefan Suchyj:  Azbukova mama (2010)