Štefan Suchyj: Vybir kosy

    Выбір косы є принаймі так серйозным ділом, як ай вмбір жены. Тадь ся їднать о будучность, ці ті буде зручні іти хлопскый рихтунок, ці ся ті удасть серенча, абы-сь ся не заплянтав на лучках жывота. Зато до міста кличеш познатого цімбору, што ся розумить до выберу кос і обидвоми зайдете до желізярьского склепу. 
   
   Склепарь, колиська Жыд а днесь обычайный ґой, ся по годині выбераня зачне по мудріяшськы посмівковати і робить ся так, як кібы тому тыж розумів. Але тотo добрый ґазда ніґда не признать, бо подля нього лем він мать тотo высоке знальцовство. Наконець цілый жывот обганять ся косoв, так чом бы ньит.  Уж-уж хоче похвалити тоту послідню, лемже... 
   
  Майстер пробовач укаже як кібы нароком праві на першу. (Не было збыточні тількы переберати, кідь наконець ай так найліпша была тота перша? Ньит, ньит, то бы собі могли доволити лем аматеры.)
   
   Куп, ґаздо, тоту першу, та не побануєш!
   
   Ай так ся даколи подаєдна не удасть так, як бы хотів почливый чоловік. Коса є коса. Жену пару раз выпашеш і є высправлена. Але з косов так не мож. Лем ты ї красні шмарь під пліт до копривы, бы їй жало дозріло. А потім - увидиш.
    
    Кого? Жену?
    
    З женов так не мож. При її выбірі є кажда чуджа рада невалушна. За женов є найліпше самому выобзерати ся. Ту ся по інакшім клепле, но тыж ся од того вшелiякый хосен одвивать.

Štefan Suchyj zo zbirky eseji: Most na rikov času
Vydal: Spolok rusyňskych pisateľiv (2009)