Štefan Suchyj: Za svjatovečorovym stolom

За святовечоровым столом

Святый вeчур, Святый вeчур...
Кілько раз ся мi уж снив?
За драгов і по обыстях
ся несе колядкoвый спів.

Выгварять отeць Отче наш
а за ним родина ціла,
зіставать навсe у душі
напахнячeна чудом хвіля.

Од молитвы й світла свічкы,
ті чувства гласкать ясный мір,
вонка ангел сніжным крылом
нарадить загроду і двір.

Чом так в хыжі, чом у грудьох
ласкы і щастноты много?
То в маминім прязнім оку
стрічаш Хріста всміхнутого.

Обпинать ланц ніжкы стола,
най ся тримлють все довєдна
фамелія і Русины,
єдной Хріста віры й мeна.

*******

Za svjatovečorovŷm stolom

Svjatŷj večur, Svjatŷj večur...
Kiľko raz s’a mi už snyv?
Za drahov i po obŷsťach
s’a nese koľadkovŷj spiv.

Vŷhvar’ať otec’ Otče naš
a za nym rodyna cila,
zistavať navse u duši
napachňačena čudom chviľa.

Od molytvŷ j svitla svičkŷ,
ti čuvstva hlaskať jasnŷj mir,
vonka anhel snižnŷm krŷlom
naradyť zahrodu i dvir.

Čom tak v chŷži, čom u hruďoch
laskŷ i ščastnotŷ mnoho?
To v mamynim pr’aznim oku
stričaš Christa vsmichnutoho.

Obpynať lanc nižkŷ stola,
naj s’a trymľuť vse dovjedna
famelija i Rusynŷ,
jednoj Christa virŷ j mena.:


Štefan Suchyj: Azbukova mama (2010)