Štefan Suchyj: Zlata azbuka (2)

M - Встрашыла ся Марька мышы
а мала мыш Марькы тыж.
Мамо, помагайте скоро,
бо ня йзість тота потвора!
 
Н - Фалатчёня-м одрізане
з драбины до неба
3 едным кілком,
а азбуці ай так мене треба.
 
О - О - є оком азбукы
або колесо без шпіць,
слово без нього є нула
горізнач і доловзниць.
 
П - Петьови іспухнув палець,
як йшов до шпайзу по смалець.
Постигла го така напасть,
-ступив на мышачу пасть.
 
Р - Рыба з раком у вырі
крутять карїчкьі собі.
Вспакны крокы пущать рак,
-забыв танці неборак.
 
С - Святый вечур твій, Ісусе,
до сердць вшыткых все ся просить.
Сій ся, світло благовїстне,
спід ніг стріблом скрипне, блисне.
 
Т - Ты-сь є столик з єднов нiжков,
плоскый грибик-земльоточ
ай пристрішок про слимака,
кідь йде буря й падать додж.

У - Вінчую, вінчую,
же за пецом крачун чую
а в пецу фучкьі із маком
й о рік буду полазником.
 
Ф - Фецю, їв ты телефон?
-Щі файнішый ґрамофон.
-Ганьбий ся на цілый світ,
тадь то пофарблёный дріт.
 
X - Хытры мають властны мухы

Де їх тримлють? В брісі, в уху?

Хотів бы й я таку мати,

та-м не годен поїмати.
 
Ц - Ладьо квасный як цітрона

Ціпонить цільїй день дома.

Цяпкають му з оч бомбулі, -

зчіщать лупы на цибулі.
 
Ч - Ніч чорна, як кока-кола,

Чарує чарами довкола.

Чорти чёрной вовны метры

чінять чортятам на светры.
 
Ш - Шкындалочко моя,

барз ся на тя строю,

вискам й розкошую,

як шыфка на морю.
 
Щ - Щербата щука

щезла у вырі,

нещастна,

же зубик зломила собі.
 
Ю - В маю і в юнію

квіткы дітей забавляють.
Потім утечуть до лїса, -

краса косы все боїть ся.

Найдьме про ню любу хвїльку:

Шуп до ліса на прогульку!
 
Я - Ягода, ягода -

літня вылагода.

Збирала бы тя я

од мая до мая.
 
Ь - Мід і мідь,

світ і світь...

Язык собі не засмїть!

Мало змін, тай уж не так, -

на прічіні мнягкый знак.
 
Štefan Suchyj: Azbukova mama (2010)