Stribro u Zombore

Стрибло у Зомборе
На 49. музичним фестивалє дзецох Войводини, фолклорни ансамб КУД "Жатва" з Коцура освоєл Стриберну плакету у конкуренциї старших дзецинских фолклорних ансамблох. У тей конкуренциї, на Фестивалє у Зомборе ше змагали 20 найлєпши ансамбли з Войводини, хтори пласман витворели на седем Зонских смотрох у Покраїни.  Фолклорни ансамбли оценьовал фахови жири - професор на Академиї уметносцох у Новим Садзе др Нице Фрациле, етнолоґ мр Ясна Бєладинович и хореоґрафове Слободанка Рац, Даяна Костич и Любомир Вуйчин.

Спрам оцени жирия, квалитет ансамблох бул на барз високим уровню, о чим шведочи и податок же шицки ансамбли назберали достаточне число бодох за перше и друге место, так же трецого места анї нє було.  Осем ансамбли освоєли медзи 90 и 100 боди и дзеля перше место, з чим достали Златни плакети.
Медзи 12 ансамблами хтори освоєли медзи 80 и 89 боди и дзеля друге место, и ансамбл КУД "Жатва", так же з освоєнима 89 бодами, ансамбл з Коцура достал Стриберну плакету Фестивала.  Дзеци з Коцура на Фестивалє у Зомборе танцовали "Руски танци зоз Коцура" а уметнїцки руководителє ансамблу Милка и Ивица Фейсово.
бронза

Тамбурашом бронза
Тамбурови оркестер КУД "Тарас Шевченко" з Дюрдьова освоєл бронзову плакету на Музичним фестивалє дзецох Войводини.
Фестивал, як найвисше змаганє дзецинских тамбурових оркестрох у Войодини, отримани 8. мая у Зомборе, а бронзову плакету, Тамбурови оркестер з Дюрдьова достал вєдно з оркестром з Руменки.
У оркестру КУД „Тарас Шевченко" на Фестивалє наступели 25-еро тамбураше, под руководством Михала Лїкара, а спрам пропозицийох, одграли 4 композициї шветових авторох и народни шпиванки.

(конєц) цики