Švetočni koncert

Шветочни концерт
Побиднїцки точки з дотерашнїх руских фестивалох, хореоґрафиї котри у тим року посцигли найвисши пласман на змаганьох, та два госцуюци ансамбли, творели програму соботового Шветочного концерту "На штред широкей ровнїни", трецей манифестациї 49. фестивала рускей култури "Червена ружа".
 

После шветочней шпиванки "Я Русин бул", котру одшпивал Мишани хор Дома култури Руски Керестур и Катедралней церкви св. о. Миколая, тогорочни Фестивал култури привитал покраїнски посланїк и предсидатель општини Кула Светозар Буквич, а програми у керестурским Доме култури, 9. октобра присуствовали и чолнїки з нашого политичного и живота нашей националней заєднїци, представителє наших установох, орґанизацийох, институцийох и здруженьох, як и представителє Руснацох з Горватскей, та числена публика.
 

Под дириґенством Лидиї Пашовей, спомнути керестурски Мишани хор на соботовей програми ошпивал ище два шпиванки - "Ганцю, не дримай и "Ей, там на гори”, а потим наступели побиднїки з наших фестивалох - Осмого фестивала жридлового шпиваня "Най ше нє забудзе” у Дюрдьове, Фестивала новей рускей народней шпиванки "Ружова заградка” у Нови Садзе и Трецого фестивала руских народних оркестрох "Мелодиї Руского двору” у Шидзе.
 

Свойо побиднїцки шпиванки - "Зродзели ше тарки" и "Другим граю" одшпивала Дзивоцка ґрупа КУД "Жатва" з Коцура "Коцурски красавици, под фаховим руководством Михала Ивана. Побиднїцки нови руски шпиванки у народним духу з "Ружовей заградки" - "Наймилша думка" и "Мамо", виведли Мирела Мали и Саня Полдруги з Коцура, док свой побиднїцки блок з Фестивала у Шидзе "Венчик руских мелодийох" и шпиванку "Мойому милому", виведол Вельки народни оркестер Дома култури Руски Керестур и шпивацки дует Андреа Бучкова и Весна Надьова, под руководством Юлияна Рамача.
 
"Руски танци з Коцура”, з хторима того року участвовали на Фестивалє фолклорних традицийох Войводини, танцовали члени КУД "Жатва" з Коцура, а домашнї, танєчнїки з керестурского Дому култури танцовали танєц "Швето на Карпатох". Хореоґрафе танцох и фахово руководителє Микола Ґубаш и Йоаким Рац Мими.
 

Руснаци з Горватскей, з КУД "Яким Ґовля" з Миклошевцох, на Шветочним концерту ше представели з Дзвицким венчиком Женскей шпивацкей ґрупи, под руководством Ани Бучковей, а фолклорни ансамбл зоз "Шаришску полку", хореоґрафа Златка Гирйоватия. Як госци тогорочного Фестивала култури, зоз своїма блоками словацких и сербских народних шпиванкох и танцох наступели КПД "Єднота" з Гложанох и ансамбл Дома култури зоз Сивцу.
 
зам