Švetovi kongres Rusinov u Rumuniji budze od 18. po 21. junij

 

Шветови конґрес РРЛ у Румуниї будзе од 18. по 21. юний

Учашнїки на схадзкох ШР и Комисиї за културу ШК РРЛ у Деви

 

ДЕВА (РУМУНИЯ) – Тринасти Шветови конґрес Русинох/Руснацох/Лемкох (ШК РРЛ) и Седми Шветови форум русинскей младежи буду отримани од 18. по 21. юний того року у городзе Дева, у Румуниї – заключене на 8. схадзки Шветовей ради РРЛ (ШР) прешлей соботи, 28. фебруара у Деви. Нєпоштредни орґанизатор схадзки Ради у Деви було Културне товаришства Русинох Румуниї – пише у обсяжним сообщеню зоз схадзки предсидатель ШР Дюра Папуґа.

 

Як порадзене, Шветови конґрес РРЛ будзе пошвецени 15-рочнїци снованя Културного товаришства Русинох Румуниї, а попри роботи у пленуме и на 6 Конґресних комисийох, будзе розпатрана и кандидатура орґанизациї „Обєдинение Русинов” з Москви, з Русийскей Федерациї, за приєм до ШК. На Конґресу будзе уручена и Награда ШР „Василь Турок Гетеш” за 2015. рок, за анґажованє у русинскей култури.

 

Кандидатури за Награду членски орґанизациї Конґресу можу електронски посилац по 30. април секретарови ШР Владимирови Противнякови, до Словацкей, заключене на схадзки Ради на основи предкладаня Комисиї за културу Конґресу, хтора прешли викенд тиж зашедала у Деви, под предшедованьом Миломира Шайтоша з Нового Саду.

 

На схадзки ШР, на хторей, як и на Комисиї за културу ШК, присуствовали члени (лєбо представителє орґанизацийох) зоз Сербиї, Мадярскей, Румуниї, Словацкей, Польскей, України, Горватскей и Шветового форуму русинскей младежи, за  нового главного редактора часопису „Глас Русина”, на основи конкурсу, вибрани Юрий Шипович з Подкарпатя, односно зоз Закарпатскей обласци України.

 

Бешедоване и о домашнїм Штернастого конґресу о два роки, за цо ше  кандидовало Дружтво Руснацох у Горватскей „Руснак”.

 

Цалосни звит з остатнєй схадзки ШР мож опатриц на сайту ШК РРЛ – www.rusynworldcongress.org

 

автор зам