Svydnyckyj Viflejemskyj večur

Свидницкый Віфлеємскый вечур 
В неділю 12. децембра 2010 о 15. годині в Домі културы в Сииднику одбыв ся  18. рочник Віфлеємского вечера. Уж 18 років в передріствянім часі приправлює Окресна орґанізація Русиньской оброды в Свиднику ріствяный концерт в русиньскім духу. Сполуорганізаторами той прекрасной акції были: Окресне освітне сентрум і Містскый уряд в Свиднику. 
 

Того року в проґрамі вечера выступили діточкы зо вшыткых матерскых і закладных школ міста. Прекрасно ся презентовав і дітскый фолклорный колектив Маковичка. В проґрамі концерту выступило 182 участників з колядками, віньчами, віфлеємскыма грами і танцями. Было на што ся призерати і слухати. Уж од скорого пообідя быв Дом културы переповненый позерателями вшыткых віковых катеґоряй, меджі котріма найвеце было родичів і старых родичів. На концерт завитав і новозволеный будучій пріматор міста Інж. Ян Голодняк і далшы честованы гості. 
Віфлеємскый вечур быв зорґанізованый на професіональнім рівні дякуючі добрій співроботі вшыткых трёх співорганізаторів і їх довгорічной практікы. На марґо тогорічного і минулорічных Віфлеємскых вечерів люде з области културы ся высловили, же неє  в Доми културы масовішой акції як є Віфлеємскый вечур. Свидницкый Дом културы є про наше місто аж крітічо малый, много людей зостало у вестибулі, якы лем слухали а нич не виділи. Многы ся повертали домів. 

Наше подякованя адресуєме і спонзорам: Інж. Михалови Гомзови, председови представенства ПСС Свидник, а.с., Бкл. Микулашови Крайковичови, посланцови НР СР, Петрови Пилипови, посланцови Пряшовского самосправного края, Еві Гомзові, посланкыні  Містского заступительства в Свиднику і далшым. Окреме хочеме ся подяковати Мґр. Ярославови Іванчови, штатному тайомникови Міністерства  школства СР, за дуже щерый спонзорскый дар, вдяка котрому каждый выступаючій і учітелі,  што їх прправлёвали однесли собі богату солодку выслужку.

Так як і минулорочный і тогорочный наш Віфлеємскый вечур бив орґанизованый без фінанчной підпоры Міністерства културы СР. 

Мґр. Мілош Стрончек, 
подпредседа 

Окресной орґанізації Русиньской оброды в Свиднику