Techňična potrimovka z Radio-televiziji Vojvodyny

Технїчна потримовка з РТВВ
И тогорочни Фестивал рускей култури "Червена ружа", котри будзе отримани у дньох викенду пред нами, будзе мац технїчну и другу потримовку Радио-телевизиї Войводини, дознава Рутенпрес од окончователя длужносци директора Дома култури Владимира Малацка.

Як ше тих дньох догварели представителє Дома култури и "Червеней ружи" з чолнима особами у РТВВ, попри уж знятих музичних матрицох за виводзенє нових забавних композицийох, у Радио Новим Садзе шицки нови композициї - и забавни и за дзеци - буду зняти и студийно.

Студийни знїмки буду основа за видаванє компакт-дискох з тогорочней "Червеней ружи", а у планє и студийне знїманє шпивачох-аматерох у змаганю за найкрасши глас.

РТВВ през три днї отримованя Фестивала на бини у Руским Керестуре будзе участвовац з часцу своєй технїчней опреми за озвученє, часц опреми обезчепує Дом култури, а будзе хасноване и ошвиценє Телевизиї Войводини.

На нєдзелю, 10. октобра, и Радио и ТВ Нови Сад, од 20 до 22,30 г., буду директно преношиц фестивалски вечар "Червена ружа" - знаганє за найкрасши глас и виводзенє нових забавних композицийох, док други два днї буду зняти. Ґу тому, крем за "Червене пупче", Руска програма ТВ Нови Сад обезпечує и своїх водительох на манифесатацийох "Ружи" - всоботу и внєдзелю.

(конєц) зам