Toho vikendu vecej značňi zbuvaňa

Того викенду вецей значни збуваня

СТАРИ ЯНКОВЦИ, ПЕТРОВЦИ, ВИНКОВЦИ (ГОРВАТСКА)- Того викенду, 22. и 23. септембра, у Старих Янковцох, Петровцох и Винковцох буду отримани вецей значни манифестациї, а у орґанизациї Дружтва Руснацох у Републики Горватскей „Руснак”. 

На ютре од 15 г., на памятнїк у Старих Янковцох буду положени венци, после чого, од 16 г., у просторийох општини буду отримани схадзки Комисиї за културу и Комисиї за просвиту Шветового конґресу Руснацох/Русинох/Лемкох (РРЛ).

Исти дзень, од 19 г., з нагоди 130-рочнїци покладаня фундаментного каменя за будинок першей рускей школи у Петровцох, на терашнїм будинку Подручней школи у Петровцох вуковарскей ОШ „Антун Бауер”, будзе одкрита памятна табла, а потим културна програма з назву „Кед голубица лєцела”.

Културна програма „Кед голубица лєцела” на ютре почнє на 19,30 г. у петровским Доме култури, а участвую шпиваче и ґрупи шпивачох, поетове и рецитаторе - представителє здруженьох зоз жемох-членїцох Шветового конґресу (ШК) РРЛ.

Попри госцох з иножемства, у ютрейшей програми наступя и шпивацки ансамбли з местох дзе жию Руснаци у Горватскей - КУД „Яким Ґовля” з Миклошевцох, КУД Руснацох з Осиєку, КУД „Осиф Костелник” з Вуковару, КУД „Яким Гарди” з Петровцох и Дружтва „Руснак” з Петровцох.

На нєдзелю, 23. септембра, зоз шветочну програму з назву „Од шерца, през шерцо, за шерцо”, будзе означена 80-рочнїца народзеня поетеси Любки Сеґеди Фалц. Програма будзе отримана у Винковцох, у просторийох Готелу „Lady М”, од 8,30 годзин.

Дводньова програма у трох местох дзе жию Руснаци у Горватскей на нєдзелю будзе закончена з Ахиєрейску службу Божу у Винковцох, у каплїчки Воздвижения Чесного Хресту Господнього од 11 годзин. Попри членох горе спомнутих Комисийох ШК РРЛ, на програмох у Старих Янковцох, Петровцох и Винковцох буду присуствовац и члени Шветовей ради РРЛ, на чолє з єй предсидательом Дюром Папуґом.

Главни орґанизатор спомнутих збуваньох Дружтво Руснацох у Републики Горватскей (РГ) „Руснак”, покровитель Совит за национални меншини РГ, а сопокровителє општини Стари Янковци и Боґдановци, Рада рускей националней меншини Городу Вуковару и Представнїк рускей националней меншини Городу Заґребу.

(конєц) зам