Totu chvorotu poznate?

Тоту хвороту познате? ...
Недавно мі была діаґностікована чудна хорота РОЗАДЕПА – РОками  ЗАпричіненый  ДЕфіціт  ПАмяти. Єй проявы суть такы:

Здумам собі, же піду найперше поляти загородку. Войду до ґаражу по гадіцю, но збачу, же і авто бы ся зышло умыти. Іду по ключі од авта, жебы-м го вывезла на двір. Але при тім увиджу на столику в ходьбі непоотвіряну пошту. Може бы было найліпше попозерати, ці там не суть даякы шекы на заплачіня. Положу ключі од авта на столик і зачну переберати пошту. Притім збачу копу рекламных брожур і іду їх вышмарити до коша в кухні. Виджу повный кош та брожуры положу на креденц а іду высыпати кош до контайнера на уліці. Притім собі усвідомлю, же коло контайнера є скрінка на письма, зато бы было добрі такой дати до ньой тото письмо, што єм вчера писала. Зайду по нього до хыжы. На столі при письмі стоїть горнятко з кавов, котру єм рано не допила. Возьму го до рукы і чую, же кава уж выхолодла. То ніч уварю собі другу та іду до кухні. Возьму горнятко і іду до кухні. Там збачу, же квіток во вазі уж скляпнув. Положу горнятко на парапет і хочу взяти вазу і напустити до ньой свіжой воды. Притім увиджу на парапеті свої окулярі, котры єм рано глядала. Мушу їх дати на свїй робочій столик, жебы єм о них знала. Але найперше преці лем долію воду до вазы. Положу окулярі, возьму вазу до рукы і збачу, же за вазов лежыть дальковый овладач од телевізора. До фраса, зась го буду вечір глядати. Мушу го положыти ку телевізору до обывачкы. Но, але тото почекать, наперед долію воду до вазы. Іду до кухні і пущам воду. Тота мі так вышплюхне, же острикать нелем лінку, але і деревяну підлогу. Іду до купельні по рянду, жебы-м то повтерала. Но на ходьбі єм уж забыла, што єм хотіла зробити.

Ку вечеру позерам, же загорода неполята, авто неумыте (а не можу ку ньому найти ключі) на вікні є горнятко зо студенов кавов, квітка во вазі начісто высохла, письмо остало непослане (а тыж го не можу найти), стратили ся мі окулярі а телевізор мушу запинати ручні, овладач є бог знать де. Чудую ся, же ніч не є готове, кедь цілый день єм ся ани не заставила і рядні єм страпена. Но ніч, іду сконтрольовати дошлы мейлы.

Зробте мі ласкавость. Препошлите тото вшыткым знамым, бо собі не можу спомянути, кому єм то написала а кому ні.
 
Гей! А не смійте ся, кедь тоту хороту не познате! Ваш день ся ближыть!
 
А. К.