U avgustu počinaju Dňji ruskej/rusnackej kultury

Шицки нашо тогорочни фестивали и културни манифестациї буду отримани под заєднїцку назву - Днї рускей култури - заключене на сходзе представительох орґанизацийних одборох фестивалох, Националного совиту Руснацох, його Одбора за културу и Заводу за културу войводянских Руснацох, дзе всоботу, 18. юлия, отримана порада о отримованю наших тогорочних фестивалох.

Днї рускей култури почню з нашим наймладшим Фестивалом оркестрох "Мелодиї Руского двору", котри у Шидзе, будзе отримани 22. авґуста, а ютредзень, 23. авґуста, у Дюрдьове будзе отримани традицийни Фестивал жридлового шпиваня "Най ше нє забудзе" - догварене на соботовим сходзе, котри источасно постал и Роботна ґрупа за фестивали при Заводзе за културу войводянских Руснацох.

Як наглашели представителє орґанизаторох тих двох фестивалох, за тераз нєт даяки векши почежкосци и финансийни проблеми коло їх орґанизованя, а очекує ше же, попри донацийох буду финансовани и зоз средствох за котри ше конкуровало при двох покраїнских секретариятох , локалней самоуправи, у чим поможе и Национални совит и Завод за културу.

Праве о средствох за тогорочни нашо и фестивали других националних заєднїцох, на штварток, 23. юлия, представителє националних совитох войводянских националних заєднїцох буду бешедовац зоз предсидательом ВР АПВ Бояном Пайтичом, после чого будзе познате з яким пенєжом и Руснаци розполагаю за орґанизованє своїх тогорочних културних манифестацийох. Днї рускей култури буду предлужени зоз Фестивалом рускей култури "Червена ружа" у Руским Керестуре и Фестивалом жридловей творчосци "Коцурска жатва" у Коцуре.

Як начално догварене, тоти два музично-танєчни фестивали буду отримани у дньох остатнього викенду у септембру, лєбо першого викенду у октобре. У рамикох Дньох рускей култури, концом октобра и початком новембра будзе отримани Фестивал монодрами и Фестивал дуодрами у Новим Садзе, од половки новембра "Костельникова єшень" а у єй рамикох планована и културна манифестация младих "Дньовка". Днї рускей култури буду закончени з манифестацию Днї Миколи М. Кочиша, початком, и "Коцурску чутку", концом децембра того року. Таки модел орґанизованя наших фестивалох бул би убудуце под єдним меном, а зоз затримованьом назви фестивала и його самостойносци, цо уж пракса и за други фестивали у Войводини.

Дальша догварка коло орґанизованя Дньох рускей култури, насампредз їх финансийного боку, будзе отримана початком септембра.

зам