U Keresturu 97-mero do peršich klasoch

У Керестуре 97-еро до перших класох

Наймладши керестурски школяре
Основна и штредня школа з домом школярох „Петро Кузмяк" до перших класох того року уписала 97 школярох. До двох оддзелєньох першей класи Основней школи „Петро Кузмяк" у тим школским року уписани 39 першокласнїки.
 
До першей класи руского оддзелєня Ґимназиї уписани дзешец школяре, а до сербского 18 ґимназиялци.
 
Аж 30 школяре уписани до першей класи штреднєй школи за туристичного технїчара, а интернат при керестурскей школи у тим року цалком пополнєти.

У Коцуре 45 першокласнїки, лєм осмеро у руским оддзелєню

Руске оддзелєнє першокласнїкох у Коцуре

У коцурскей Основней школи „Братство-єдинство" тей єшенї до першей класи рушели 45 першокласнїки.
 
До руского оддзелєня уписани лєм осмеро дзеци, а у наступних штирох рокох учителька им будзе Лидия Будински. До двох сербских оддзелєньох уписани 37-еро дзеци, а учительки им буду Миряна Бокан и Мария Полдруги.
 
У Коцуре и того школского року предлужени тренд же руски родичи свойо дзеци уписую до сербских одзелєньох. У двох сербских одзелєньох добра часц дзецох Руснаци.

Вше менєй школярох

Руски школяре у Миклошевцох
Нови школски рок у Горватскей почал 2. септембра, та так и у Миклошевцох, Петровцох и Старих Янковцох, дзе ше факултативно виучує руски язик по моделу „Ц", спрам хторого тижньови фонд виноши 5, односно 2 годзини по оддзелєню. Годзини ше отримує под час порядней настави, лєбо пополаднями.
 
У Миклошевцох у перших штирох класох єст лєм 9 школярох, цо найменєй до тераз, а настава ше одвива у двох комбинованих одзелєньох. У Петровцох єст 25-еро дзеци, та єст штири оддзелєня.
 
Миклошевски школяре висших класох на подядну наставу путую до Матичней школи у Чаковцох, а петровски до Вуковару. Школяре у Старих Янковцох маю осемрочну основну школу.
 
И попри одредзених проблемох, годзини мацеринского язика поряднє нащивюю шицки школяре-Руснаци, як и дзепоєдни припаднїки других националносцох.