U Mikloševcoch Preslaveni Dzeň Rusnacoch

После означованя Дня Руснацох на уровню Републики Горватскей 25. мая у Вуковаре, Рада рускей националней меншини Општини Томповци всоботу, 15. юния, орґанизовала преславу того швета и у Миклошевцох. У просторе Дружтвеного дому отримана Шветочна академия, на хторей присуствовали дожупан Вуковарско-сримскей жупаниї Дьордє Чурчич, началнїк Општини Томповци Томислав Паненич, його заменїки Здравко Звонарич и Мирослав Лїкар, декан сримски о. Яким Симунович, заступнїк у Совиту за национални меншини Републики Горватскей Звонко Костелник и други госци.
 

После державней гимни и Шветочней шпиванки Руснацох у Горватскей „Браца Русини", присутних перше привитал доначальнїк Општини Томповци спред рускей националней меншини и предсидатель Општинскей ради Мирослав Лїкар, а о. Яким Симунович, як висланїк владики Крижевского, кир Николи Кекича, Миклошевчаном пренєсол його поздрави и жаданя же би Руснаци на тих просторох и надалєй пестовали свою виру, язик и културу, як найвекши и найзначнєйши дарунок будуцим ґенерацийом.
 

Винчуюци швето, нововибрани началнїк Општини Томповци Томислав Паненич виражел надїю же ше у општини, як вецейнационалней заєднїци, буду затримани шицки богатства народох, цо єден з важних задаткох у розвиваню сучасного дружтва у наиходзацим чаше. Швето у свойо и у мено жупана Божи Ґалича повинчовал и дожупан Дьордє Чурчич, здогадуюци же у Вуковарско-сримскей жупаниї кажди пияти граждан припаднїк даєдней националней меншини.
 

У културно-уметнїцкей програми з рецитациями и шпиванками наступели школяре ОШ Чаковци котри ходза на годзини мацеринского язика, а порихтала их учителька Леся Мудри, з помоцу учительки у пензиї Ксениї Лїкар. Женска шпивацк ґрупа КУД „Яким Ґовля" одшпивала два народни шпиванки, а Ксения Лїкар мл. рецитовала писню Петра Бучка „Нашо дїдове".
 

Конферансу по горватски и руски успишно водзели школяре Паула Поточки и Иван Лїкар, а цалосному шветочному упечатку допринєсли и членїци Здруженя женох „Миклошевци", котри простор прикрашели з виставу ручних роботох, шматох и предметох. Жени з того здруженя порихтали и стари руски лакотки, котри нащивителє коштовали на коктелу после Академиї.
 

Як дознава Рутенпрес, Дзень Руснацох у Горватскей, у орґанизациї Заступнїка Руснацох Городу Заґребу мр Иринея Мудрия, внєдзелю, 16. юния, з пригодну програму означени и у главним городзе Горватскей. Програму возвеличали и члени КУД „Яким Гарди" з Петровцох.

 

автор:  клї