U Rumuniji ňeška zakončeňe Švetovoho Kongresu RRL

У Румуниї нєшка законченє Шветового Конґресу РРЛ

 

ДЕВА (РУМУНИЯ) – У Деви, у Румуниї нєшка будзе закончени Тринасти Шветови конґрес Руснацох/Русинох/Лемкох (ШК РРЛ), а вчера пополадню у Деви отримани и Седми Шветови форум русинскей младежи. На обидвох сходох участвую делеґати и госци зоз жемох-членїцох Конґресу и Форуму з Европи и Сиверней Америки.

 

ШК РРЛ нєшка будзе закончени з другим пленарним зашеданьом, на хторим предшедуюци конґресних комисийох поднєшу звити зоз своїх вчерайших сходох, а Конґрес предложи и активносци у наступним дворочним периодзе.

 

Делеґати нєшка одлуча чи до Конґресу будзе прията Медзиреґионална дружтвена орґанизация „Обєдинєнє Русинох” з Москви, з Русиї, будзе розришена дотерашня Шветова рада, хторей на чолє бул Дюра Папуґа з Руского Керестура, и на дворочни мандат вибрани нови члени Ради, як и єй предсидатель и двоме подпредсидателє.

 

 На дньовим шоре нєшкайшого пленарного зашеданя и прилапйованє предлогох за вименки Статута ШК, прилапйованє Преглашеня 13. Конґресу о витворйованю правох Русинох на Подкарпатю (Закарпатю) у України за їх припознаванє за окремну меншинску националну заєднїцу, як и одредзованє домашнього наступного Конґресу. Спрам скорейших догваркох, Штернасти конґрес РРЛ найвироятнєйше будзе отримани у Горватскей.