Učastňiki u predstavi "Eftajova dzivka" u Kocure 1925.roku

Учашнїки у представи ”Єфтайова дзивка” у Коцуре 1925. року

На нєшкайши дзень, 21. фебруара 1925. року першираз на сцени виведзени перши драмски текст на нашим руским язику, руского автора з тих просторох - драма "Єфтайова дзивка" Гавриїла Костельника.
 
Правиводзенє "Єфтайовей дзивки" було у Коцуре у Чобановей карчми, а на сцену ю зоз 26 ґлумцами поставел учитель Дюра Дудаш. Улогу "Єфтайойовей дзивки" толковала Мелана Сакач, а "Єфтая" Ґабор Стрибер.
 
Як записане у тедишнїх "Руских новинох", на премиєри "Єфтайовей дзивки" у Коцуре присуствовали и госци з Руского Керестура, Кули, Дюрдьова, Миклошевцох и Бачинцох, и вєдно з домашнїма, до Львова послали привитне писмо др Костельникови, з чим ище раз указали чесц и подзекованє писательови першей драми на руским язику.
 
Драма з библийну тематику "Єфтайова дзивка" Г. Костельника обявена 1924. року як окремна кнїжка у виданю Руского народного просвитного дружтва  (РНПД), так же ше того року наполнюю 90 роки од єй видаваня. Медзи двома шветовима войнами була єдна з найбавенших представох у местох дзе жию Руснаци у Бачкей и Сриме.
 
У нєшкайши час, праве з представу "Єфтайова дзивка" у сезони 2002/03. року закончена робота тедишнього Руского народного театру "Дядя". Представу режирал Владимир Надь Ачим, а улогу "Єфтайовей дзивки" у тей представи толковала теди штредньошколка, а нєшка позната професийна ґлумица Даниєла Штайнфелд. Улогу "Єфтая" ґлумел Иван Папуґа з Вербасу. Попри по наших местох, представа госцовала и у Словацкей, у Прешове на "Карпат фесту", хтори орґанизовал Театер Александра Духновича.
 
Вязано за театрални рочнїци, на нєдзелю, 23. фебруара, наполнї ше 101 рок од виводзеня першей театралней представи при Руснацох у Бачкей и Сриме, кед 1913. року у Коцуре одбавени два драмски єднодїйки Єронима Я. Луцика "Нє преклїнай" и "Врачарка", цо була историйна подїя за културни живот Руснацох на тох просторох.