Umar Miroslav Silaďi

Умар Мирослав Силадї

Нєшка рано, 30. децембра 2012. року, у Вербаше у своїм 55. року живота нєсподзивано умар Мирослав Силадї, главни редактор културно-белетристичного часопису Шветового конґресу Русинох/ Руснацох/ Лемкох, администратор веб сайту Шветового конґреса РРЛ www.rusynworldcongres.org, автор власного веб сайту www.rusnak.info, донєдавни технїчни редактор и администратор сайту Новинскей аґенциї "Рутенпрес" www.ruthenpress.info, дописователь Радио Нового Саду, програми на руским язику.

Мирослав Силадї бул окреме активни член Рускей матки, предсидатель Месного одбору Рускей матки у Вербаше од 2002. року, односно од його снованя. Бул член Управного одбору Рускей матки и портпарол Рускей матки. На 10. Шветовим конґресу РРЛ 2009. року бул предсидатель Конґресней комисиї за економски розвой и привредне сотруднїцтво.

Мирослав Силадї народзени 17. децембра 1957. року у Вербаше, дзе закончел основну и штредню школу. Робел вецей од 25 роки у Фабрики цукру у Вербаше, по єй приватизацию, а потим ше опробовал у самостойним привредзованю.

Його главне опредзелєнє бул ґрафични дизайн, першенствено у виробки плакатох, поволанкох, каталоґох, алє и на шицких других продуктох рекламного и пропаґандного материялу. Окреме бул заинтересовани за виробок и администрованє интернетових сайтох и продукцию музичних радио и телевизийних емисийох.

Чувствовал потребу правдивого и точного информованя и пласованя информацийох у цо кратшим чаше, и у подполносци ше до того процесу уключовал.

Почитовал сатиру, бул автор векшого числа сатиричних приповедкох медзи хторима и сатирична сказка "Руски цар", а 2011. року бул лауреат першей награди "Соцки" на манифестациї гумору и сатири "Коцурска чутка".

За главного редактора културно-белетристичного часопису Шветового конґресу Русинох/ Руснацох/ Лемкох "Голос Русина" меновани є на 4. зашеданю Шветовей ради РРЛ 27. мая 2012. року у Кринїци у Польскей.

Хованє покойного Мирослава Силадя будяе наютре, 31. децембра 2012. року на теметове у Вербаше на 14,00 годзин.

Най му будзе вична слава и памят.

Djura Papuga