V Čertižnim odkrŷly tablu Dobr’aňskomu

V seli Čertižne, v okresi Medžilaborci, v nediľu 8-ho jula 2018-ho roku odkrŷly pamjatnu tablu jednomu iz najvŷznačnišŷch rusyňskŷch budyteliv 19-ho stoliťa – Adolfovy Dobr’aňskomu. Dobr’aňskŷj mav u tim seli svoju kuriju i je v nim pochoronenŷj.

Avtorkov pamjatnoj tablŷ iz reľjefom Dobr’aňskoho je akademična skulptorka Eva Potfajova-Іľkovičova. Tabla bŷla zroblena za hrošŷ, kotrŷ vŷzberalo u publičnij zbirci občaňske združiňa Kolŷsočka – Kolíska, jake reagovalo v mynulim roci na jubilejnŷj Rik Adolfa Dobr’aňsnkoho, kotrŷj bŷv vŷhološenŷj Okruhlŷm stolom Rusyniv Sloveňska, i v ramkach kotroho prochodylo dakiľko podij prysvjačenŷch budyteľovy.

Podija začala o tretij popolidne svjatočnŷm chodom od mistnoj grekokatolyc’koj Cer’kvy Voznesenija Hospodne ku hrobu Adolfa Dobr’aňskoho. Tam učastnŷ pomolyly s’a panachidu za budyteľa, kotru služŷly po cer’kovnoslavjaňskŷ iz rusyňskŷma jektenijamy svjaščenycy Obščestva sv. Joana Krestyteľa vjedno iz mistnŷm parochom.

Po panachidi toržestvo prodovžovalo kolo budovŷ siľskoho ur’adu, na kotrij bŷla pamjatna tabla odkrŷta. Učastnŷch, medži kotrŷma bŷly jak domašni, tak i darc’ove na tablu iz ciloj Slovakiji, pryvitav starosta sela Čertižne Petro Tričak. Potim slidovalo svjatočne odkrŷťa tablŷ. Tablu odkrŷvala jij avtorka Eva Potfajova-Іľkovičova i organizatorka zbirkŷ Ľuba Kraľova.

Po odkrŷťu peredav starosta peredav slovo otc’ovy Milanovy Jasykovy iz Obščestva sv. Joana Krestyteľa. Tot korotko pryblyžŷv žŷvot Dobr’aňskoho i joho odkaz pro našu generaciju. Po slovach Jasyka pryhovoryla s’a učastnŷm Ľuba Kraľova, predsednyčka občaňskoho združiňa Kolŷsočka – Kolíska, kotra poďakovala avtorci tablŷ i všŷtkŷm, kotrŷ požertvovaly na toto dilo svoji hrošŷ. Prypomjanula, že zbirka bŷla vŷhološena v ramkach jubilejnoho roku vŷhološenoho Okruhlŷm stolom Rusyniv Sloveňska i v tot deň tota zbirka vlastno definitivno distala materialnu podobu i zaveršŷla s’a. Tak samo poďakovala starostovy sela i všŷtkŷm Čertižňanam, že s’a prykladno starajuť o hrob budyteľa i o to, žebŷ na ňoho ne zabŷlo s’a.

Tabla bŷla mistnŷm parochom posvjačena i nakonec’ s’a všŷtkŷm darc’am na toto dilo zaspivalo Mnoholitsvije.

Podija bŷla zakinčena vece jak hodynovŷm kulturnŷm programom v prostorach salŷ siľskoho ur’adu, v ramkach kotroho vŷstupaly Labir’skŷ beťare, Voľanka iz Volici, Narodna muzyka Dribna i Anna Servic’ka. Učastnŷ jak peršŷ mohly v tot deň posmotryty sobi iz toj nahodŷ odkrŷtu pamjatnu izbu v prostorach siľskoho ur’adu, de mož vydity artefaktŷ mistnoj narondoj kulturŷ jak čertižňaňsku vŷšŷvku ci skulpturu Adolfa Dobr’aňskoho, kotru selu podarovav Okruhlŷj stil Rusyniv Sloveňska.

PETRO MEDVІĎ