V Maďar’sku i Serbiji začalo spysovaňa žŷteliv

Spysujuť s’a i Rusynŷ.

1-ho oktobra 2022-ho roku začalo spysovaňa žŷteliv v dalšŷch dvoch krajinach, de žŷjuť i Rusynŷ. Maďar’sko i Serbija začaly vjedno, no zakinčiňa majuť v inšŷch terminach.

Belegrad i Budapešť spysovaňa žŷteliv, kotre u vekšŷni krajin prochodylo v mynuvšim roci, perenesly na rik 2022. Oficialnov pryčinov perenesiňa perepysu, kotrŷj maje robyty s’a raz za des’ať rokiv, bŷla pandemija Covid-19.

Zochab slid
V Serbiji spysovaňa žŷteliv prochodyť lem starov, „papir’ovov“ metodov. Žŷteliv buduť navščivľovaty komisari spysovaňa, kotrŷ bŷ maly robyty intervju z každov osobov okremo, pokľa to ne je možlyve. Jeden člen obŷsťa može podaty informaciji za všŷtkŷch členiv.

Rusyňskŷ organizaciji i profesionalnŷ inštituciji vŷzŷvaly v liti ľudej, žebŷ holosyly s’a za komisariv na spysovaňa. Predstavyteli Rusyniv bŷly peresvidčenŷ, že je važnŷm, žebŷ do rusyňskŷch obŷsť chodyly rusyňskŷ komisari i odpovidi, holovno što do narodnosty, materyňskoho jazŷka i religiji, ne bŷly nyjak manipulovanŷ.

Republikovŷj štatičnŷj ur’ad pro kampaň spysovaňa vŷbrav heslo Ber učasť na spysovaňu – zochab slid. Deň pered počatkom spysovaňa ur’ad v stolyci Serbiji išči organizovav pereskonferenciju, na kotrij informovav o doteperšinich aktivnosťach odnosno prypravi spysovaňa, jak i o aktivnosťach, kotrŷ buduť prochodyty počas mis’ac’a, koly bude spysovaňa prochodyty.

Spysovaňa v Serbiji zakinčiť s’a 31-ho oktobra. Podľa dostupnŷch informacij peršŷ rezultatŷ spysovaňa v Serbiji bŷ mohly s’me diznaty s’a na kinc’u novembra, najpizniše v marci 2023-ho roku.

Rusynŷ v Serbiji tak samo zalučily s’a do spoločnoj kampani ku spysovaňu, keď perevz’aly i chosnujuť grafiku, jaku s’me mohly vydity i v dalšŷch krajinach. Heslo S’me Rusynŷ chosnujuť u svojij varianti rusyňskoho jazŷka – Rusnacy zme.

V Maďar’sku spysaty mož s’a elektronično i z komisar’om
Maďar’sko maje kombinovanu formu spysovaňa. Od sposobu vašoho vŷberu zaležŷť i data, koly možlyvosť spysaty s’a kinčiť.

Pokľa s’a chočete spysaty elektronično čerez portal spysovaňa, pak majete čas lem do 16-ho oktobra. Pak bŷ mala bŷty onlajna forma zaperta i nastupyť tradičnŷj sposob spysovaňa poserednyctvom komisariv, kotrŷ za vamy pryjduť domiv. Spysovaňa, kotre pak bude prochodyty už lem „papir’ovo“, bude kinčity 20-ho novembra.

Jak informovav Centralnŷj štatističnŷj ur’ad, spracovaňa danŷch, kotrŷ s’a zdobuduť v spysovaňu, pak bude tŷrvaty do 28-ho novembra 2023-ho roku.

Onlnaj formular’ je na sajti spysovaňa lem po maďar’skŷ i po anglic’kŷ. No na sajti Vsederžavnoho rusyňskoho samospravovaňa všŷtkŷ voprosŷ iz oficialnoho formular’a protlumačenŷ suť na rusyňskŷj jazŷk.

Za našŷma informacijamy, choc’ v onlajn formi spysovaňa ne mož vŷbraty sobi rusyňskŷj jazŷk, pry tradičnim spysovaňu poserednyctvom komisariv bude mož vŷbraty sobi i rusyňsku verziju, kotra bŷla na žadosť deržavnŷch organiv zroblena.

V Maďar’sku tak samo dakotrŷ rusyňskŷ organizaciji zalučily s’a do spoločnoj kamapni S’me Rusynŷ – Ruszinok vagyunk, kotru s’me mohly vydity i v Poľšči, na Slovakiji ci Chorvatiji.

Pokľa v Serbiji zistala dalše lem jedna možnosť pryholosyty s’a ku narodnosty, v Maďar’sku už v druhim za por’adkom spysovaňu mož sobi vŷbraty dvi narodnosty, jak to bŷlo možlyve v Poľšči, na Slovakiji ci v Čes’kij republici.

Petro Medviď 

žridlo:
https://www.lem.fm/v-madyarsku-i-serbiyi-zachalo-spisovanya-spisuyut-sya-i-rusiny/