V Ruskom Keresture začala kampaň "Od domu do domu..."

РУСКИ КЕРЕСТУР - УПИСОВАНЄ ДО ОВС
У Керестуре почала кампаня од хижи до хижи 
 

Початком того тижня, у Руским Керестуре почала кампаня ходзеня "од хижи до хижи" пре уписованє цо векшого числа Руснацох зоз Руского Керестура до Окремного виберанкового списку (ОВС), а на основи одлуки Совиту Месней заєднїци Руски Керестур.
 

На Совиту Месней заєднїци наглашене же тота терашня акция представя лєм роботу на уписованю, а нє "кампаню" за вибор Националного совиту.

После прешлотижньовей кратшей обуки, єденац особи спред Месней заєднїци ходза од хижи до хижи, з цильом уписованя цо векшого числа Керестурцох до Окремного виберанкового списку.
 

Месна заєднїца з тей нагоди наглашує же то за тоту роботу овласцени особи, та поволує Керестурцох же би им вишли вочи при уписованю до списку.

Ище скорей тей одлуки Месней заєднїци, з истим цильом до акциї уписованя до ОВС за Руснацох уключел ше и Месни одбор Демократскей странки Руского Керестура.
 

Члени МО ДС, активисти и симпатизере, прешлих дньох тиж нащивйовали Керестурцох пре уписованє до того ОВС и за очековац же до конца того тижня, число уписаних Руснацох будзе значно звекшане.
 

Член Совиту МЗ и народни посланїк др Дюра Мученски, вчера за Рутенпрес потвердзел же у цеку активносци на тим же би ше подобну акцию орґанизовало и у сотруднїцтве з другима меснима заєднїцами и општинами у местох дзе жию Руснаци.

У тим напряме, того тижня Мученски и предсидатель НС Руснацох Славко Орос, нащивя нашо места и чолнїкох општинох местох дзе жию Руснаци.
 

(конєц) зам