V Zyndranovij pochoronyly Fedora Goča

В Зындрановій похоронили Федора Ґоча 

В четвер, 8. червця/юнія 2018 р., в Зындрановій прошли похоронны богослужыня культурно-політичного діяча Федора Ґоча. Попращати ся з покійным пришли чысленно лемківскы і украіньскы соспільно-культурны активісты, делеґациі з Польщы, Словациі і Украіны.

Богослужыня зачали ся перед хыжом Федора Ґоча, де труна з тілом покійного пращала ся з ґаздівком і найблизшом родином. Короткє казаня выголосил о. Юлиян Феленчак з Морохова. Дальше кондукт перешол до поблизкой церкви св. Миколая. Літургію очелил владыка перемышльско-ґорлицкой єпархіі архієпископ Паісий при участи священників парохій з Лемковины і священника з Пряшівщыны.

В проповіди владыка Паісий підкрислил, што Федор Ґоч был будівничым зындранівской церкви, першого православного храму на Лемковині, побудуваного по ІІ світовій войні. Споминал на рокы німецкой окупациі, вязніня, выселіня, нелегкого повороту. Владыка спомянул на «лемківскій рай на земли», фунґуючий такой од 1968 р. Музей Лемківской Культуры в Зындрановій, котрий основал Федор Ґоч, якій зберігал там материяльну спадковину Лемковины. Лист од владыкы Авеля, архієпископа люблиньско-холмской єпархіі прочытал о. Роман Дубец.

На похороні присутны были лемківскы соспільно-культурно-політичны діячы поколіня Федора Ґоча. Прибыли Маестро Ярослав Трохановскій, Павел Стефановскій, Петро Трохановскій-Мурянка, Адам Барна. Сучасны лемківскы орґанізациі были представляны через Андрия Копчу, Штефана і Северияна Косовскых зо Стоваришыня Лемків, Наталию Малецку-Новак зо Стоваришыня «Руска Бурса» з Ґорлиц, Юрия Стариньского з ЛАПіТ «Кычера» з Ліґниці. Украіньскы орґанізациі репрезентували м.ін. Григорий Куприянович з Украіньского Товариства з Люблина і Штефан Гладик та Василь Шлянта з Обєднаня Лемків.

Прибыли делеґациі з Украіны і Словациі. Присутний был проф. Микола Мушынка з Курова, Владимір Шандаля зо Свидника.  Локальны власти репрезентуваны были бургомайстром Дуклі Анджейом Бытнаром та пріматором словацкого міста Свидник Яном Голодняком. Присутны были пожарникы з місцевой Добровільной Протиогньовой Стражы та репрезентанты інчых ґруп і середовиск.

Феодора Ґоча пращали щыры приятелі Лемків з польского середовиска, м.ін. Антоний Крог, Єжы Чайковскій, Збіґнєв Волянін, Станіслав Криціньскій і Тадеуш Кєлбасіньскій.

На зындранівскым теметові голос мали представникы меншын при Спільній Комісиі Уряду та Нацийональных і Етнічных Меншын Польской Республикы. Выступили Мирослава Копыстяньска, як репрезентантка лемківской меншыны, та Григорий Куприянович, як репрезентант украіньской меншыны. Василь Шлянта прочытал верш Александра Маслея. Послідню проповід над труном выголосил о. Петро Пупчык з Крениці.

На погребинах споминове слово на покійного выголосили Мария Туцка, Юрий Стариньскій, Ярослав Трохановскій, Адам Барна, Андрий Копча, о. Роман Яґєлло, парох польскокатолицкой парохіі і дальшы жалобникы. Юлия Дошна заспівала смутну лемківску пісню.

Федор Ґоч спочал в рідній земли, близко плеканого роками музею. Лишыл жену Марию, сынів Богдана і Романа з родином.

Zdroj:
http://www.lem.fm/v-zyindranoviy-pohoronili-fedora-gocha/