Vasyľovy Jaburovy uďilyly Zolotu medajlu PU

Jak informovav Іnštitut rusyňskoho jazŷka i kulturŷ Pr’ašivskoj univerzitŷ v Pr’ašovi (PU), v ponediľok 15-ho apriľa 2024-ho roku odbŷlo s’a svjatočne zasidaňa Akdemičnoj hromadŷ PU.

V ramkach ňoho udiľovala s’a i najvŷsša nahoroda univerzitŷ, kotrov je Zolota medajla Pr’ašivskoj univerzitŷ.  Totu nahorodu rektor univerzitŷ Peter Koňa udilyv Vasyľovy Jaburovy, jednomu iz dvoch holovnŷch kodifikatoriv rusyňskoho jazŷka na Slovakiji iz 1995-ho roku.

Vasyľ Jabur sobi nahorodu perevz’av za vŷznačnu naučno-pedagogičnu robotu i rozvytok Іnštitutu rusyňskoho jazŷka i kulturŷ i Pr’ašivskoj univerzitŷ v Pr’ašovi.

Vasyľ Jabur
Doc. PhDr. Vasyľ Jabur, k. n. narodyv s’a 28-ho oktobra 1936-ho u Staščini, vtohdŷ Čechoslovakija. І keď bŷv za profesijov rusista, a v tim fachu dijav jak univerzitnŷj pedagog, od počatku 1990-ŷch rokiv začav s’a zanymaty kodifikaciov rusyňskoho literaturnoho jazŷka na Slovakiji.

U 1995-im roci, vjedno z doc. PhDr. Jurijom Paňkom, k. n., bŷv holovnŷm kodifikatorom rusyňskoho jazŷka na Slovakiji. Od roku 1998 učiv morfologiju i sintaxis na sučasnim Іnštituti rusyňskoho jazŷka i kulturŷ Pr’ašivskoj univerzitŷ v Pr’ašovi, kotrŷj perešov riznŷma nazvamy. Je avtorom abo spivavtorom mnohŷch naučnŷch publikacij i učebnykiv rusyňskoho jazŷka.

Nahorodŷ Vasyľa Jabura
Karpatorusyňskŷj naučnŷj center v Spojenŷch štatach Amerykŷ udilyv Vasyľovy Jaburovy u 2007-im roci Premiju svv. Kirila i Metodija za rozvytok rusyňskoho jazŷka.

U 2016-im roci mu bŷla peredana Premija Aleksandra Duchnoviča. Choc’ Karpatorusyňskŷj naučnŷj center v Spojenŷch štatach Amerykŷ udiľuje totu premiju za rusyňsku literaturu, Jaburovy bŷla udilena za joho velykŷj vklad do kodifikaciji rusyňskoho jazŷka, bez kotroj bŷ ne bŷlo any literaturŷ.

Pr’ašivska univerzita v Pr’ašovi udilyla Vasyľovy Jaburovy Stribernu medajlu za ciložŷvotne dilo i vŷznačnŷj vklad do oblasty naukŷ i osvitŷ u 2019-im roci.

Okruhlŷj stil Rusyniv Slovakiji v roci 2020 zapožŷčav Vasyľovy Jaburovy Orden Adolfa Dobr’aňskoho IV. klasŷ. Orden distav za vŷznačnŷj vklad do oblasty rozvytku rusyňskoho jazŷka.

27-ho juna 2021-ho roku prezidentka Slovac’koj republikŷ Zuzana Čaputova udilyla Vasyľovy Jaburovy Prybyniv krest III. klasŷ za vŷňatkovŷ zasluhŷ o rozvytok Slovac’koj republikŷ i za zasluhŷ pry kodifikaciji rusyňskoho jazŷka.

Petro Medviď

žridlo: https://www.lem.fm/vasilovi-yaburovi-udilili-zolotu-medajlu-pu/

foto: Іnštitut rusyňskoho jazŷka i kulturŷ PU