Vecej jak 2000 naščiviteľoch na "Vodova festu"

РУСКИ КЕРЕСТУР – Всоботу вечар зоз концертом ґрупи "Електрични орґазам" и огньометом закончени треци музично-забавни фестивал "Водова фест", котри орґанизовала младежска орґанизация Руского Керестура Пакт Рутенорум.

Програма "Водова фест" отримана на керестурским базену, дзе ше програма одвивала на трох бинох - на Главней, на Реґе-бини и на Водоваелектро-бини, цо у ствари бина на ладї котра на керестурским базену була два днї Фестивала.

У програмох тогорочного "Водова фесту" участвовали попри менєй познатих, и познати ґрупи, як цо то "Електрични орґазам", "Атеист реп", "Луде краве".

На "Водова фесту" наступели и ґрупи зоз Руского Керестура, младим уж добре познати "Крейзи казнс", "Брейнлоу" и "Парадокс", а публику забявяли и даскелї ди-джейове.

Под час тирваня "Водова фесту" прейґ своїх штандох на базену, представели ше навияче "Русина" - "Дзиви швинї", наш Младежски часопис "МАК", Младеж "Язасу", Каритас, Пакт Рутенорум и Волонтерски центер Войводини.

У рамикох програми "Водова фест" отримане и стретнуце байкерох, а у орґанизациї керестурского Мото-клуба "Шаркань".

Новосц тогорочного Фестивала бул окремни простор, наволани "Оводова-стейдж", односно простор з рижнима забавнима бависками и аниматорами, дзе родичи-нащивителє "Водова фесту" могли охабиц дзеци на чуванє .

На двох вечарох "Водова фест" було вецей як 2 000 нащивительох, векшина младих зоз Руского Керестура и цалей Войводини.

Интересанто повесц же радио Нови Сад дал вельку увагу керестурскому Фестивалу и под час двох дньох тирваня того Фестивала порядно информовал своїх слухачох зоз директним уключованьом своїх сотруднїкох котри були у Руским Керестуре.

зам/дюв/єп