Veľkonocna vinčovanka kyr Georgija

Вельконоцна винчованка кир Георгия 
Владика Георгий: Христос Воскрес! Воистину воскрес!

АПОСТОЛСКИ ЕҐЗАРХАТ - З нагоди Велькей ноци, хтора того року у исти час и по юлиянским и по григориянским календаре, апостолски еґзарх за грекокатолїкох у Сербиї, кир Георгий Джуджар, упутел шлїдуюцу винчованку з нагоди найвекшого християнского швета:

-Зисцело ше предсказане. Исус церпел и бул забити, до чого ше спричинєл єден од Його ученїкох Юда Искариотски. Збуло ше шицко тото пре страх од Исуса, од якого ше злєкли юдейски первосвященїки. А Исус зоз своїм животом и зоз свою креву знїщел нашу кару и прецерпел за нашо грихи.

-Та и од мертвого Исуса ше бали и прешлїдзовали Го. Поховали Го до нового гроба, запечатовали гроб и положели стражу коло нього. Знали вони же Вон чловек, же є тераз мертви, же є запечатовани у гробе зоз стражу, и же нє може вецей нїч зробиц. Алє вони нє були свидоми того цо ше збува з другого боку того гроба. Исус зишол до аду и вишлєбодзел Адама и Еву, пророкох и других праведнїкох - закончело ше панованє шмерци и диявола.

-Христос Воскрес! За цали людски род настало швитанє нового живота. Була то перша побида живота над шмерцу, а конєчна побида будзе теди док будзе знїщене єй жридло у швеце - грих. Борба зоз грихом без Иуса Христа и Його ученя - нєможлїва чловекови.

-Прето подїя Воскресеня Христового - найвекше християнске швето. То побида над грихом и шмерцу и початок нового живота, котри пошвецує сам Христос. Прето и так триюмфално звуча слова котри так часто виповедаме у тим вельконоцним чаше: Христос Воскрес! Воистину Воскрес! З тима словами ми виявюєме нашу виру до Воскресеня Христового. Цали швет, материялни и духовни, видими и нєвидими, радує ше и триюмфує, злїва ше з вичним животом Царства Нєбесного.

-Перши тидзень вельконоцного часу царски дзвери на иконостасох по церквох оставаю отворени. Вони отворени як символ того же нам отворени дзвери до Царства Нєбесного, на одредзени способ уж и на тим швеце. Уходзме през нїх до Царства Христового. Воскреснути Исус нас чека споза отворених дзверох, на яких нєт печатох, анї стражи при нїх. Ми тоти котри ше зоз своїм добродзечним ришеньом долучуєме до заєднїцтва тих котри слухаю Його глас и иду за нїм, же би мали живот вични.

-Праве то и причина пре котру вам винчуєм тото вельке и радосне швето над шветами, и торжество шицких торжествох. Од того нєт нїч векшого и важнєйшого. Прето будзме радосни у Господу и укажме нашу радосц и любов ґу Ньому прейґ радосци и любови ґу своїм блїзким, братом и шестром у Исусови Христови.

Христос Воскрес!
Ваш владика Георгий