Vinčovanka Michaelovi Dudašovi

 

Винчованка Михаелови Дудашови
Репрезентативцови Сербиї у атлетики Михаелови Дудашови з Нового Саду, на посцигнутим барз вельким успиху на Шветовим першенстве у атлетики, у мено Националного совиту Руснацох, винчованку вчера послал и предсидатель Националного совиту Славко Рац.

- Почитовани Мижу, шицких гражданох Сербиї, а окреме Руснаци у нашей жеми, щиро и барз обрадовал твой позарядови успих - освойованє 6. места у дзешецбою, витворйованє А-олимпийней норми и ознова поставянє державного и власного рекорду, котри ши посцигнул на Шветовим першенстве у атлетики, у Даеґуу у Кореї.

- Руснаци у Сербиї з гордосцу провадза твою удатну атлетску кариєру, котра з каждим змаганьом у пороснуцу, та так було и у дньох кед ши барз успишно наступал у змаганьох на тогорочним Шветовим першенстве, знаюци же за таки успихи потребна длуга и нєсебична робота, витирвалосц и упартосц, цо ши пожертвовно указал и доказал и з остатнїма посцигнутима резултатами.
           
- Цешиме ше у це и твоїх успихох и жадаме ци, насампредз, вельо здравя же биш и надалєй могол посциговац позарядово резултати у тей чежкей атлетскей дисциплини - на радосц и пиху и Сербиї и шицких Руснацох - гвари ше у винчованки Михаелови Дудашови, котру му у мено Националного совит Руснацох послал Славко Рац.
                                                                                               
(конєц) зам