Vistava Vladimira Provčija i zajednicki koncert Mikloševčanoch i Verbaščnoch

На концу заєднїцкей програми - На моногая и благая лїта!
Прешлей соботи и нєдзелї, 31. авґуста и 1. септембра, у Миклошевцох було наисце шветочно, понеже отримана 28. Културна манифестация „Миклошевци 2013", хтору орґанизовало домашнє КУД „Яким Ґовля" з помоцу валалских здруженьох, а под покровительством Совиту за национални меншини Републики Горватскей. Сопокровителє Манифестациї були жупан Вуковарско-сримскей жупаниї, Општина Томповци и Союз Русинох и Українцох Горватскей.
 
Перши дзень Манифестациї, всоботу пред вечаром у голу Подручней школи отворена вистава малюнкох уметнїка Владимира Провчия з Риєки, по походзеню Миклошевчаня. Виложени 22 малюнки у технїки акварел и акрил, з двома мотивами - ружох у руских националних фарбох - билей, червеней и чарней и тащкох. То Провчийова сто дзешата самостойна вистава, хтора достала и позитивну оцену критики, а автор у нєй посцигнул нови, иншаки попатрунок на свою роботу.
 
Зоз заєднїцку програму двох дружтвох - домашнього „Яким Ґовля" и КПД „Карпати" з Вербасу, з Войводини, всоботу вечар почала музично-танєчна часц „Миклошевцох 2013".
 
У першей часци дзецинска танєчна ґрупа домашнїх одтанцовала два танци, у хореоґрафиї Желька Лїкара, дует Паула Поточки и Милица Мишлєнович, котрих на гармоники провадзел Иван Лїкар, одшпивали два руски народни шпиванки, док домашня женска шпивацка ґрупа тиж одшпивала два народни шпиванки.
 
Програму предлужели госци з Вербасу, котри першираз участвовали на тей манифестацї. После „Привитного танцу" Виводзацкей танєчней ґрупи, ґлумец Янко Лендєр нашмеял патрачох з виривками з монодрами „Илия опозиция" Дюру Папгаргая, у власней режиї.
 
Танєчнїки потим одтанцовали „Дуботанєц" и „Гопак", у хореоґрафиї Славка Микитишина, а публика их одушевено наградзела з кляпканьом. Дзецинска танєчна ґрупа, под руководзеньом Ирени Скубан, виведла „Руски народни танци" и танєц „Двоме шугайове", а програму Вербащанох дополнєли и красни шпиванки у виводзеню мишаней шпивацкей ґрупи, дуетох Славки и Михала Тамаша, Гелени Сабадош и Софиї Мученски и солистки Дияни Мученски.
 
На концу програми подпредсидателька КПД „Карпати" Нада Лендєр и предсидатель КУД „Яким Ґовля" Мирослав Гайдук вичерали дарунки, зоз жаданьом же би ше предлужело приятельски одношеня - „на многая и благая лїта" - як на остатку одшпивали шицки учашнїки програми, котрих цали час провадзел оркестер вербаских „Карпатох", под руководством Миколи Чижмара.