Vňedzeľu zakončeni "Petrovsky dzvon"

Внєдзелю закончени „Петровски дзвон”
Внєдзелю пополадню и вечар отримани закончуюци програми централней манифестациї Руснацох и Українцох Горватскей „Петровски дзвон", на хторих участвовали руски и українски КУД з Горватскей и госци з других народох и националних меншинох.
 
После гимни Републики Горватскей и Шветочней шпиванки Руснацох у Горватскей, перши з атрактивним танцом наступели домашнї з КУД „Яким Гарди", потим Дружтво Руснацох и Українцох з Винковцох, Дружтво Руснацох з Осиєку, а на „Петровским дзвонє" першираз участвовало и новоосноване дружтво „Руснак и Рускиня" зоз Заґребу.
 
У програми надалєй участвовали члени Дружтва „Рушняк" з Риєки, та културно-уметнїцки дружтва „Осиф Костелник" з Вуковару, „Яким Ґовля" з Миклошевцох, „Цвелферия" з Раєвого села, як и госци з Кородю, Дреновцох, Пишкуревцох, Винковцох, Вуковару, Свиняревцох и Канїжи.
 
Ювилейни, штерацети „Петровски дзвон" внєдзелю закончени з цаловечаршим концертом музично-танєчного ансамблу Дому култури Руски Керестур. Петровчаньом и їх госцом ше представели Народни оркестер, женска и шпивацка ґрупа, соло- шпиваче и дуети и Виводзацки танєчни ансамбл Керестурцох.
 
Публика у полней сали петровского Дому култури керестурских аматерох и їх квалитетну програму наградзовала зоз щирима аплаузами, а з тим предлужена и традиция же на „Петровским дзвонє" вше наступа и даєдно дружтво Руснацох з Войводини.

автор:  дюв