Vozvraščenije Marijapovčanskoji Čudotvornoji Ikony

Чудотворна Икона Божої Матері сім місяцюв находилася у Гайдудорозі. 7 фебруара сього рока у сопровожденіи дакулькох тысяч вірникув Икона была перенесена у Гайдудорог, бо на місті її постоянного нахожденія у Маріяповчанськуй церкви зачалася реставрація. У місті її временного пребыванія до прибытія Иконы дуже добре подготовилися. А Она указала, ош и на новому місті, її материнська любов не ослабла до тых, кто до неї обертаєся, ош Она усе и усягды выслухать тых, кто просить помощи уд неї.

Айбо Икона Божої Матері має своє постоянноє настоящоє домувство. Теперь реставраторы достигли тоі стадіи у своюй роботі, котра зробила возможным, обы Чудотворна Икона вернулася дому. Сесе сталося 5 септембра. Икону ладилися сопровождати многисленні паломники. Уже у вечері спередущого дня зачалися приготовленія не лем фізично, а и достойным образом духовно, обы щастя вуд того, ош Икона вернулася на своє місто, было повным. Под вечер змішаный хор Кантемус дав благотворительный концерт. Послі того зачалося ночноє бденіє. А число паломникув усе росло и росло, обы прийняти участіє у сяті перенесеня Иконы. На щастя вітренна погода помінялася, и настало світлоє рано. Дякувучи сьому, у 3 годины послі короткої молитвы и короткої вдохновенної бесіды епископа о. Фюлепа Кочіша, дві тысячі паломникув рушили у путь из Чудотворнов Иконов. Чудотворну Икону несли 8 мужчин, поперемінно через кажді 300-400 метрув по маршруту Гайдудорог-Уйфегирто—Ер поток—Жінделеш—Нодькалло—Каллошемйен -Почпетрі-Маріяповч. На сесе почетноє и духовно возвышенноє заданіє приголосилися вірники булше ста парохій, до котрых присоєдинилися на невеликому участку арестанты тюрмы регіона Саболч-Сотмар-Берег.

Процессія паломникув идучи, співала греко-католичеські літургічеські піснопінія и Маріаповчанські співанкы, прославлявучи Божу Матір. По пути были благословлені ищи три иконы, котрі будуть основами будущого маріянського пути. Из часом число паломникув продолжало увеличоватися, на каждуй штаціи до процесіи присоєдинялося сотні паломникув, межи ними быв и Нандор Бошак - епископ области Ніредьгазы-Дебрецен. Такым образом, назбиралося коло 5000 паломникув, у сопровожденіи котрых Чудотворна Икона Божоі Матери достигла гатарув Маріяповчи, де приблизно тулько же чоловік чекали вертавучуся дому Марію. Шествіє проходило по пути, выкладеному мийчешами до площади перед церквов. У неділю послі Сятої Літургіи и вечурні Чудотворна Икона назад зайняла своє постоянноє основноє місто у Маріяповчанськуй базилиці.

Норберт Задубенскі
Семінарист Rózsák terei hírmondó