VUKOVAR (Chorvatsko) - NACIONALNE ŠVETO RUSNACOCH

По першираз преславени Дзень Руснацох Горватскей
У Вуковаре всобиту, 29. мая, по першираз у историї, означени Дзень Руснацох у Републики Горватскей - 25. май, котри вибрани як датум снованя грекокатолїцка парохиї у Петровцох, и тот датум ше будзе означовац каждого року.

 Орґанизаторе означованя Дня Руснацох Горватскей була Координация руских радох, главни орґанизатор Городска рада рускей националней меншини Вуковар, а перше означованє Дня Руснацох отримане под високим покровительством предсидателя Републики Горватскей Иви Йосиповича, котрого на Дню Руснацох представял Желько Сабо, городоначалнїк Вуковару.

 На Шветочней академиї з нагоди першого означованя Дня Руснацох у РГ о виборе датума за Дзень Руснацох, прешлосци и терашнєй роботи и живоце Руснацох у Горватскей бешедовал предсидатель Координациї радох рускей националней меншини Яким Ерделї, котри привитал и визначних госцох з РГ, алє и зоз Сербиї - народну посланїцу у Скупштини РС Олену Папуґа и предсидателя Националного совиту рускей националней заєднїци у Сербиї Славка Ороса.

 Ердель наглашел же тото Швето най будзе нагода за ище векше обєдиньованє шицких Руснацох у Горватскей на очуваню националного идентитету, так як то робели и їх предки, котри до Горватскей пришли и остали пред коло 180 роками.

 - У РГ тераз жию коло 2 500 Руснаци, а у тим краю и найвецей - коло 1 700 и гоч асимилованє поробело свойо, заш лєм оставаме ту на своїм - гварел Яким Ерделї, дзекуюци шицким предходним и терашнїм ґенерацийом на очуваню и розвиваню рускей националней меншини у Горватскей.

 Швето Руснацом повинчовал и висланєц предсидателя Горватскей, та и у мено Вуковарско-сримскей жупаниї - городоначалнїк Вуковару Желько Сабо, а пречитана и винчованка предсидателя Собору РГ Луки Бебича.

 Нє длуга, алє удатна и з обдуманим вибором точкох и їх квалитетним виводзеньом, Шветочна академия отримана у сали "Лавослава Ружички", котра була цесна прияц шицку заинтересовану публику, а орґанизаторе, з окремнима автобусами, оможлївели приход Руснацох з Петровцох и Миклошевцох на тоту шветочносц.

 После шпиваня Горватскей гимни и Шветочней шпиванки Руснацох Горватскей -дакус текстуално модификованей композициї "Браца Русини", у виводзеню здружених хорох дружтвох з Вуковару и Винковцох, под руководством Агнети Тимковей, на Академиї през конферансу по руски и горватски, та поетских творох представена история Руснацох у Горватскей.

 Руски народни и други шпиванки одшпивали Микола Пап з Винковцох, дует Ана и Геленка Бучково з Вуковару, Женска жридлова шпивацка ґрупа КУД "Яким Ґовля" з Миклошевцох, Ґабриєла Ткалац и КУД "Калїна" з Риєки и наша позната соло-шпивачка Агнета Тимкова.

 Стихи Агнети Бучко Папгарагї, Любки Сеґеди Фалц, Силву Ерделя, Осифа Костелника и Митра Надя рецитовали Ана Бучко, Марина Колбас, Оля Мудри, Ирена Надь и Лидия Павлович з Вуковару и Петровцох, конферансу написала Агнета Бучко Папгаргаї, а водзели ю Илона Гнатко и Йосип Маєр.

 Шпивачох провадзел здружени Мишани оркестер з КУД з Осиєку, Петровцох и Миклошевцох, под руководством Юлина Бучка, котри бул задлужени за музични, а бешедни точки Шветочней академиї пририхтали Мария Хома и Агнета Бучко Папгаргаї. Як госци, з шпиванку по горватски наступел Мишани хор КУД "Дунай" з Вуковару.

 Означованє Дня Руснацох була нагода за здогадованє на дзепоєдни историйни факти: Руснаци ше на територию нєшкайшей Републики Горватскей почали насельовац у першей половки 19. вику, перше до Янковцох, та до Петровцох, на Ґрабов, до Миклошевцох, Дєлетовцох, Маринцох, Вуковару, Винковцох, Раєвого Села, Пишкуревцох, до Дякова и других сримских и славонских местох и то зоз Бачкей - з Руского Керестура и Коцура.

 До Петровцох ше Руснаци приселєли 1834. року, до Миклошевоцх 1850., други валали населєни познєйше, а найвецей по конєц 19. и початок 20. вику, же би ше потим розселєли по цалей Горватскей.

 Гоч нєшка малочислени, по своєй традициї су вельки, бо ше очували и нє страцели руски язик, грекокатолїцку виру и свою културу. У каждим месце дзе жиє векше число Руснацох, постоя грекокатолїцки церкви и КУД, у двох основних школох орґанизоване пестованє руского язика и култури, а богата и видавательна дїялносц по руски.

 (конєц) зам