Vyhlásenie predsedu Svetovej rady Rusínov

Сообщенє предсидателя Шветовей ради 
 

З нагоди початку нового рока, явносци ше зоз своїм Сообщеньом оглашел и предсидатель Шветовей ради Руснацох/Русинох/Лемкох Дюра Папауґа, у хторим визначує главни напрямки роботи Конґреса и його Шветовей ради у тим року, односно у наступним периодзе.

"Основни задаток шицких орґанизацийох Руснацох/ Русинох/ Лемкох, членох Шветового конґреса РРЛ, у 2010. року треба же би бул очуванє и дальши розвой власного идентитета. На прешлим, 10. Шветовим конґресу РРЛ обдумани велї заєднїцки активносци и акциї з тим цильом, та Шветова рада РРЛ будзе инсистовац на їх реализациї и зоз медзиконґресним анґажованьом конґресних комисийох".
 

"Рамикова конвенция за охрану националних меншинох у жемох Европскей униї и Европска повеля о реґионалних, або меншинских язикох Совиту Европи, у седем - од осем державох у хторих нєшка жиєме - даваю нам широки можлївосци за витворйованє своїх правох на защиту и очуванє власного идентитета. Так то у Польскей, Словацкей, Медярскей, Ческей, Румуниї, Горватскей и Сербиї, а лєм на Подкарпатю, у України, нєшка то нє так, алє и там раз, наздавам ше пошвидко, розум победзи и Русини витворя основни народносни права".
 

"Окреме нам значни муша буц пририхтованя за наступни попис жительства 2011/2012. року. У жемох у хторих то ище нє поробене, треба утвердзиц национални символи Русинох - герб, заставу и гимну, и утвердзиц и обдумац Националне швето Русинох, хторе би ше преславяло каждого року. Треба розбиц "фаму" о заостатосци Русинох, визначовац и наградзовац найвизначнєйших творительох, уметнїкох, спортистох...”
 

"У министерствох просвити державох у хторих жиєме треба инсистовац на витворйованю условийох за образованє дзецох и младежи на мацеринским язику на шицких уровньох, од предшколского, през основне и штреднє, по високошколске образованє. Треба витвориц условия за стретнуца школярох и студентох зоз жемох у хторих жиєме, як и черанки студентох и професорох найменєй по єден семестер зоз Катедри за руски язик и литературу Филозофского факултета у Новим Садзе, Института русинского язика и култури ПУ у Прешове и Педаґоґийней академиї у Кракове".
 

"У обласци култури треба инсистовац на обовязним поволованю и обовязним участвованю наших ансамблох зоз шицких жемох у хторих жиєме на наших найзначнєйших рочних фестивалох”.
 

"Уж вецей роки, як нєобходносц и нужна потреба, наклада ше орґанизованє периодичних семинарох зоз фолклористики, першенствено русинского народного, обичайного, стилизованого и уметнїцкого танцу”
 

"Розвой русинскей музейскей активносци треба запровадзовац у шицких жемох у хторих жиєме, а найзначнєйши активносци концентровац у Музею русинскей култури СНМ у Прешове”.
 

"У обласци информованя треба зачувац досцигнути уровень у друкованих медийох и вельо вецей сотрудзовац у електронских медийох”.

"Шицким Руснацом/ Русином/ Лемком у 2010. року жичим вельо щесца и здравя, вельо особни и дїловни успихи, окреме у заєднїцких активносцох и роботох на очуваню Русинства" - гвари ше у сообщеню предсидателя Шветовей ради РРЛ Дюру Папуґу.
 

(конєц) зам