VYZVA: IMPLEMENTAČNE PYSMO CILOSVITOVOHO APELU PRO LIDROV RUSYŇSKYCH ORGANIZACIJ

ІМПЛЕМЕНТАЧНЕ ПИСМО ЦЇЛОСВІТОВОГО АПЕЛУ ПРО ЛІДРІВ ОРҐАНІЗАЦІЙ

 

ВАЖНЕ!

Дорогый лідер русиньской орґанізації!

 

26. октобра на Українї проходили вольбы до Верьховной рады – вольбы новых законодарцїв, котры будуть робити довєдна з новозволеным презідентом Порошенком на будованю демократічнїшой Україны з цїлём шыршой інтеракції із западом. Правду повісти, Україна вже з Европсков уніов підписала договор о придружіню.

 

Нова україньска влада буде наісто сондовати свою політіку, враховано політікы о прав меншын. Зато якраз теперь пришов час про русиньску громаду на цїлім світї обернути увагу на проблем, же Україна до днешнїх днїв не вызнає Русинів як самобытну народность ани як офіціалну народностну меншыну на Українї, і треба то акутно рїшати.

 

Жебы вызнаня карпатьскых Русинів як самобытной народности набыло штатут офіціалной задачі про штат, яку нова україньска мусить рїшати, розбігуєме цїлосвітову кампань. Выкликуєме Україну вызнати Русинів як офіціалну народностну меншыну на Українї із вшыткыма правами, признаныма другым офіціално вызнаным меншынам на Українї.

 

Просиме Вас, жебы сьте ся к нам у тій кампани придали. Є барз важне, жебы Україна чула голос своїх жытелїв, жытелїв членьскых штатів Европской унії, жытелїв Америкы і Канады, а таксамо і голос далшых.

 

Великым плусом про тоту акцію є факт, же міджінародна карпаторусиньска громада може свої актівіты розвивати посередництвом інтернету і на основі того мож повісти, же є віртуално поперепоёвана. Є то інтернетова кампань, жебы ї мож было наскоро пошырёвати і мала якнайбівшый досяг.

 

 

Кампань має три аспекты: 

-  карпаторусиньскы лідры будуть выкликовати Україну к актівному дїяню

-індівідуалны особности з рядів карпатьскых Русинів і їх приятелї будуть выкликовати Україну к актівному дїяню

- в міджінародных медіях буде опублікована офіціална прес-інформація о тій акції

 

 

Ту уводиме о што Вас, як лідра в русиньской орґанізації (громады) просиме:

 

Днесь ідьте на change.org і підпиште петіцію за вызнаня карпатьскых Русинів на Українї. Кідь так зробите, автоматічно буде одослане Выголошіня з апелом ключовым лідрам Україны, Европской унії, США, Канады і другым. Вы і вшыткы функціонарї вашой орґанізації бы то мали зробити індівідуално. Кідь будете підписовати онлайн (on-line) петіцію, выповнийте і колонку з прічінов чом петіцію підписуєте. Прошу Вас, напиште і Ваше мено, і назву вашой орґанізації. Текст апелу є приступный в русиньскім, анґліцькім, словацькім, польскім і російскім языку, жебы каждый міг вжыти язык, якый му є найблизшый.

 

Пошлийте і-мейл вашым колеґам із жаддостёв, жебы пішли на вебову сторінку change.org і зробили то саме што Вы – підписали петіцію. Попросьте їх, жебы і они розослали петіцію на підпис далшым карпатьскым Русинам, котрых знають, або і приятелям, котры не суть Русинами.

 

Вложте лінк до статусу на Ваш фейсбуковый профіл із просьбов на прятелїв, жебы ся придали і стали ся участниками електронічной (віртуалной) кампанї.

 

Вложте лінк на Вашу вебову сторінку і пошлийте жадость Вашым членам, жебы ся таксамо стали участниками кампанї.

 

Пошлийте приложеный текст прес-інформації вашым містным медіям, пресі, радіям і телевізіям. ПРЕС-ІНФОРМАЦІЮ НЕ МІНЯЙТЕ! Важне є, жебы медії дістали єднаку справу в єднакім часї. 

 

Тото вшытко бы ся мало одбыти якнайскорїше!

 

Кідь маєте даякы вопросы к апелу, прес-інформації ці імплементації той кампанї, контактуйте:

 

В Северній Америцї: Джон Ріґетті    і-мейл:     rusynone@gmail.com

В Европі:     Славомір Гиряк              і-мейл:    hirjakslavo@gmail.com

Допереду Вам дякуєме за Вашу участь. Така шанса приходить лем раз. Зато не одшмарьте можность выслати міцный і коордінованый сіґнал новій україньскій владї і тым субєктам, з якыма сполупрацує, о тім, же теперь є час вызнати карпатьскых Русинів на Українї! 

 

Патріція Крафчік

 

Председкыня

Карпаторусиньске конзорціум Северной Америкы