VYZVA PRO STAROSŤIV I PRIMATORIV RUSYŇSKYCH SEL I MIST

ВЫЗВА ПРО СТАРОСТІВ І ПРІМАТОРІВ РУСИНЬСКЫХ СЕЛ І МІСТ

Честованы Русины, дорогы колеґове, поздравую вас вшыткых коло вашой каждоденной нелегкой роботы і єдночасно вас таков формов хочу ословити і покликати до співпраці.

Многы з вас, котры слідують події сполоченьского і културного жывота Русинів, істо знають, же теперь проходить в Народній раді Словацькой републікы процес схвальованя закона о Фонді на підпору културы народностных меншын, котрый буде намісто проґраму Култура народностных меншын. Вже при дотеперішній сістемі сьме не были, а ани не сьме спокійны зо сістемов, правилами і способом роздільованя грошей про русиньску народностну меншыну, як і зо слідуючов контрольов схоснованых грошей. Не знам, ці сьте тот закон чітали або припомінковали, но кідь буде схваленый в теперішній подобі, треба ся нам з ним порядні познакомити і припадно доїднати подля можностей іщі даякы правила креованя оцінюючіх ґруп і самого роздільованя грошей.
(Закон о Фонді на підпору културы народностных меншын найдете ТУ:  https://www.nrsr.sk/web/Default.aspx?sid=zakony/zakon&MasterID=6280/  )

Як староста русиньского села Баєрівці, член Округлого стола Русинів Словеньска, чоловік, котрый має намагу о серьйозну співпрацу вшыткых русиньскых орґанізацій, вшыткых Русинів, но головно чоловік, котрый має много неґатівных скушеностей зо сучас нов формов перероздільованя грошей на културу народностных меншын, вас вызывам на серьйозну діскузію і співпрацу в тій проблематіці. Бо єм того погляду, же пінязі приділены на русиньску културу бы першорядно могли іти ку людям, котры ся ку Русинам офіціално приголосили в нашых селах і містах.

Тоту тему, а може і іншы нашы проблемы бы сьме хотіли з вами обговорити коло Округлого стола Русинів Словеньска, де можуть брати участь вшыткы русиньскы орґанізації, представителі сел, міст, церьквей, но і окремы актівісты. Вірю тому, же тій вызві зрозумієте в добрім і прийдете на діскузію о тых проблемах. В припаді інтересу найдете інформації на сайті  https://okruhly-stol.sk/.  Жычу вам много успіхів у вашій роботі і у вашім жывоті.

Михал Секерак, Баєрівці


Засiданя ОСРС ся одбуде 3.6.2017 oд 08:30г у СНМ-Музей русиньской культуры, Масарикова ул. 20, Прешов.   Сердечнi позываме !