Z otrymovaňom "Dňovky" počala tohoročna programa "Kosteľnikovej ješeňi"

Зоз програму младих "Дньовка", всоботу 14. новембра, у Руским Керестуре закончена перша часц програми на означованю тогорочней шеснастей културней манифестациї “Костельникова єшень”.

На "Дньовки" всоботу свою творчосц у вецей обласцох представели коло 50 млади креативни особи. Програма почала всоботу дополадня з виставу малюнкох, рисункох, скулптурох и фотоґрафийох младих авторох зоз Руского Керестура, Коцура, Дюрдьова и Норт Бателфорду з Канади.

Истого дня , всоботу вечар од 20,30 годзин у Велькей сали Дома култури була отримана културна програма младих, зложена з вецей змистох - драмских, поетских, филмских и музичних.

У рамикох "Дньовки" того року були представени и нови кнїжки поезиї Наташи Регаковей "Ошмихи", и "У блїзкосци и далєкосци" Асї Папауґовй, обидвох з Руского Керестура. Тиж так у рамикох тей програми наступели млади поетове чийо твори обєдинєни у збирки под заєднїцку назву "Дебитанти".

Першираз того року у рамикох "Дньовки" бул и проєкция двох авторских филмох - "Вода" и "Коцурски Кирбай", а у музичней часци участвовалили ґрупи, солисти, дуети и состави, хтори виведли авторску и обробену музику.

После програми отримане друженє учашнїкох и публики, а тогорочну "Дньовку" заєднїцки орґанизовали Младежска орґанизация Руского Керестура "Пакт Рутенорум" и Орґанизацийни одбор "Костельниковей єшенї".

Програма шеснастей Културней манифестациї "Костельникова єшень" будзе предлужена шлїдуюцого викенда, од 20. по 22. новембер, з програмами у Руским Керестуре, Кули, Вербаше и Коцуре.

(конєц) зам