Za rusinsku kulturu u tim roku prejg 8,5 milioni dinari

 

Розпатранє приявох хтори з наших КУД, орґанизацийох и установох сцигли на конкурс Покраїнского секретариуяту за културу и явне информованє, та на конкурс Покраїнского секретарияту за образованє, управу и национални заєднїци, були главни точки вчерайшей схадзки Одбору за културу Националного совиту Руснацох. Схадзка отримана у просторийох Дому култури Руски Керестур, а попри векшини членох Одбору, на нєй присуствовали и предсидатель Националного совиту Руснацох Славко Рац, предсидатель Вивершного орґану Совиту Йовґен Мудри, та нєдавно меновани директор Заводу за културу войводянских Руснацох Серґей Тамаш.
 

На спомнути конкурси нашо орґанизациї конкуровали з 28 проєктами, лєбо за порядну дїялносц, дзе Покраїнски секретарият за културу у тим року за Руснацох опредзелєл милион 650 тисячи, Покраїнски секретарият за национални заєднїци милион 200 тисячи динари, так же на Одборе за тельо средства дата препорука же би ше пенєж розподзелєло нашим орґанизацийох по местох.
 

Ґу тому, розподзелєни и вєдно милион 260 тисячи динари од НС Руснацох, односно його Одбору за културу, а бешедоване и средствох з локалних самоуправох дзе робя нашо КУД и орґаниазциї, хтори плановани на 3 милиони 290 тисячи динари. Тоти средства законска обовязка локалних самоуправох, алє буду видвоєни дзекуюци и анґажованю чолнїкох нашого НС и нєпоштредних контактох з представнїками локалних самоуправох, на хторих спозорене праве на сполньованє тей обовязки.
 

Тиж так, спрам скорейшей Одлуки Управного одбору Заводу за културу ВР, за фахову помоц, односно роботу фаховцох по наших КУД у тим року плановане видвоїц милион динари, так же вєдно, за орґанизовану, порядну роботу, та за нашо маифестациї и фестивали, односно, по шицких спомнутих основох, мож повесц же за руску културу у 2013. року буду опредзелєни 8 милиони 550 тисячи динари.
 

На схадзки бешедоване и о Календаре манифестацийох, хтори того року будзе дакус вименєни пре централну шветочносц означованю значних ювилейох у Коцуре, у авґусту, так же и Одбор за културу прпоручує КУД „Тарас Шевченко" у Дюрдьове же би лєм того року пременєл термин отримованя Фестивалу „Най ше нє забудзе". Тиж так, и Фестивал хорох у Вербаше будзе 1. юния, односно убудуце будзе отримовани у терминє хтори ше нє будзе преклапйовац з традицийним вебаским Фестивалом поезиї младих.

 

автор:  зам