Zadovoľstvo z novim zakonom

Як и представителє других националних заєднїцох, виражуєм вельке задовольство же маме єден главни закон котри детально и системно ушорює обласц меншинских правох и попри задовольства, тиж виражуєм и подзекованє шицким котри участвовали и у його твореню и його прилапйованю у Народней Скупштини, виявел за Рутенпрес предсидатеь Националного совиту Руснацох, Славко Орос.

Вон гварел же пред нами тераз "вельо роботи накадзи тот Закон ступи на моц, понеже шлїдза виберанки за нови национални совити, накадзи вони буду заказани и розписани, алє и други активносци у шицких обласцох предвидзених зоз Законом о националних совитох".

- З новим Законом у значней мири преширени компетенциї националних совитох у штирох обласцох за хтори су задлужени-образованє, информованє, култура и урядове хаснованє язика и писма, у старим Закону були баржей началного характеру, а тераз су конкретизовани, гварел Орос.

- Єдна з тих компетенцийох то и глєданє думаня, лєбо согласносци од националних совитох за роботу и руководительох установох и институцийох у обласцох над хторима совити компетентни, та думам же, накадзи тот Закон зажиє, будзе змоцнєта комуникация медзи националнима совитами и установами, орґанизациями и институциями з тих штирох обласцох.

Орос наглашел же нови Закон точнєйше одредзує и способ финансованя националних совитох, цо подрузумює ище векше професионализованє їх роботи, та з тим и векши средства за национални совити.

- У члену 114. того Закону, предвидзене же ґлобална сума опредзелєна за национални совити з уровню Републики, будзе дзелєна на основи одредзених критериюмох - 30 одсто тей суми єднак шицким националним совитом, а друга часц - спрам числа припаднїкох єдней националней заєднїци и числа институцийох, установох, здруженьох и других орґанизацийох єдней заєднїци у тих штирох бласцох над хторима совити маю компетенцию - гварел Славко Орос.

(конєц) зам