Zašedala Švetova rada RRL

Зашедала Шветова рада РРЛ

У Мадярскей отримана схадзка Шветовей ради РРЛ  

Зоз схадзки Шветовей ради Руснацох/Русинох/Лемкох (ШР РРЛ), хтора под предшедованьом Дюру Папуґу отримана 2. мая у Пилишсенкересту коло Будапешту, у Мадярскей, дата потримовка Русином на Подкарпатю, у України, же би до Верховней ради України, та Парламенту Европскей униї, обновели вимоги за врацанє Закона о реґионалних и меншинских язикох у тей держави.

Як за Рутенпрес гварел предсидатель ШР Дюра Папуґа, на схадзки у Мадярскей прилапени конєчни текст вимоги хтори Шветова рада, односно Конґрес, пошлє до польского Сейму (Скупштини), до Влади Польскей, як и до компетентних орґанох ЕУ, о преглашеню Акци "Висла" у Польскей (1947. року) за нєзаконїту.

Тиж так, ШР до Министерства просвити Мадярскей пошлє и вимогу же би ше, попри терашнєй порядней науковей роботи Институту русинистики на Сеґединским универзитету, у Сарвашу, обновело и наставу русинистики за заинтересованих студентох.

Источашнє у Мадярскей зашедала и Комисия за историю Шветового конґресу, под предшедованьом др Михайла Фейси, так же Рада прилапела єй предкладанє же би шлїдуюци Шветови конґрес бул пошвецени 75-рочнїци народзаня Василя Турока Гетеша и 20-рочнїци кодификованя русинского язика у Словацкей.

Як гварел Дюра Папуґа, Комисия за историю инсистує же би до проєкту "Коляди при РРЛ" були уключени шицки членїци Конґресу. Спомнути зборнїк би мал висц до Крачуна того року, а у пририхтованю и други проєкт - "Историйни датуми РРЛ", хтори ма буц витворени 2015. року.

На остатнєй схадзки Ради винєшене же Други Медзинародни фестивал мултижанровей русинскей музики, цо тиж єден з проєктох Шветового конґресу, будзе отримани у новембру, у Пряшове.

Члени Ради и Комисиї за историю Конґресу пияток, 2. мая, нащивели и гроб-памятнїк академика Антония Годинки на теметове у Будапешту, котри поховани у алеї заслужних гражданох.

автор:  зам