Zavod za kulturu VR na novej adresi

 

ЗАВОД ЗА КУЛТУРУ ВР НА НОВЕЙ АДРЕСИ 
Вчера у Новим Садзе отримана шветочносц з наґоди преселєня Заводу за културу войводянских Руснацох до нових просторийох, у Футожскей улїци число 2.

Нове шедзиско Заводу у просторийох хтори му на хаснованє уступела Новинско- видавательна установа “Руске слово”, а Завод зоз свойого боку обезпечел финансийни средства за адаптованє и ушоренє того бувшого квартелю, хтори длугши час бул нєфункционални.

Дотерашнї роботи коштали 3 милиони 50 тисячи динари, з хторих милион пренєшени средства Заводу з прешлого року, а остаток будзе виплацени з тогорочного буджету институциї.

Квартель, поверхносци 127 квадратни метери, подполно преушорени и реконструовани, так же достати квалитетни, сучасни и вецейфункционални дїловни простор, хтори може сполнїц шицки потреби Заводу за културу, алє и других руских институцийох, кед за то будзе потреби.

Заменїк предсидателя Националного совиту Руснацох Мирон Сабадош з тей нагоди гварел же Руснаци у Новим Садзе тераз конєчно маю свой репрезентативни простор, на пиху и на хасен цалей рускей заєднїци. Сабадош наявел жє до нових просторийох будзе преселєна Подручна канцелария Националного совиту за Нови Сад.

Директор Заводу за културу Мирослав Кевежди и директорка “Руского слова” Мартица Тамаш визначели добре сотруднїцтво тих двох установох у реализациї того проєкту, хтори потримали и Национални совит Руснацох и Покраїнски секретарият за културу, спред хторого на шветочнопсци бешедовал Драґан Сречков.

Роботи на адаптованю просторийох почали 11. мая, а закончени су скорей предвидзеного термину. Покля нє будзе одплацена инвестиция до адаптованя того простору, Завод за културу нови просториї будзе хасновац безплатно.

(конєц) саб