Zmina pidpory kultury narodnostnych menšyn

 

Зміна підпоры културы народностных меншын

 

О тім, же дотачна сістема културы народностных меншын на Словакії ся мінить, же быв вытвореный новый Фонд на підпору културы народностных меншын і етнічных ґруп і парламентом схваленый його закон, сьме в нашых новинках уж інформовали.

 

Подля споминаного закона єдным із орґанів споминаного фонду суть одборны рады, векшыну котрых творять представителі народностной меншыны. Єдным із крітерій Фонду была вызва на реґістрацію орґанізацій народностных меншын, котры суть актівны найменше три рокы. На тій основі до становленого терміну ся зареґістровало 50 русиньскых орґанізацій. Чудуєте ся, де ся їх тілько набрало? Окрем такых, котры познаме, як Русиньска оброда на Словеньску, Театер Александра Духновіча, Радіо Русин.фм, Молоды Русины на Словеньску, Інштітут русиньского языка і културы Пряшівской універзіты, Сполок русиньскых писателів Словеньска, Здружіня інтеліґенції Русинів Словеньска, Колысочка, Руськый клуб 1923, Русин і Народны новинкы, Світовый конґрес Русинів, Русиньске културно-освітнє общество А. Духновіча, Надація Кременець, Русиньскы голосы, Русинія і т.д., находиме найвекше чісло, до двадцять орґанізацій, у свідницькім окресі. Тоты вшыткы мали подля закона право волити членів одборных рад, котры будуть схвальовати дотації русиньскых орґанізацій на будучій 2018-ый рік. Правда, подля становленых крітерій, хто мав веце орґанізацій, тот мав і векшу кількость голосів і векшу надію, же його кандідат буде до одборной рады і схваленый.   

 

Волебне згромаджіня орґанізацій народностных меншын на вольбы членів одборных рад проходило 12-го октобра в Братіславі. Засіданя скликав  Норберт Молнар, директор Фонду на підпору културы народностных меншын, котрый не належыть під Уряд влады СР як то было дотеперь, але під міністерство културы Словацькой републікы. У просторах Танечного штудія Іфю Сівек в Братіславі привітав представителів русиньской народностной меншыны директор Фонду Н. Молнар, котрый найперше поінформовав о поступі волеб і кількости одборных рад - тоты могли быти три або єдна. 

 

За овірителів заспису были нашыма членами схвалены Ян Липиньскый і Петро Штефаняк, до волебной комісії – Вєра Юрічова, Мілан Піліп і Кветослава Копорова.   Представителі русиньской народностной меншыны векшынов голосів вырішыли, же на посуджованя проєктів на будучій рік буде робити єдна одборна рада. За членів той одборной рады зволили Марію Пайзінкову, директорку Піддукляньского освітнього центра у Свіднику, Анну Кузмякову, редакторку НН Інфо Русина - Народных новинок Русинів на Словакії і Маріяна Марка, директора Театру Александра Духновіча в Пряшові. Далшых двох членів споминаной рады установить подля закона о Фонді його директор Н. Молнар.

 

Фонд на підпору културы народностных меншын і етнічных ґруп бы мав до 31-го децембра 2017–го року опубліковати вызву на передкладаня проєктів на 2018-ый рік.   

 

-акуз-

Foto:
Norbert Molnár, riaditeľ fondu