SKR žadať bezodkladne zastavliňa perzekucij Rusyniv na Ukrajini 

Zvertať s’a do slovac’koho premjera.

Svitovŷj kongres Rusyniv pryjav vŷhološiňa, kotrŷm zvertať s’a do premjera vladŷ Slovac’koj republikŷ Eduarda Hegera, i žadať bezodkladne zastavliňa perzekucij Rusyniv na Ukrajini, jak i pryznaňa jich narodnostnŷch prav.

Kongres zvertať s’a do slovac’koho premjera z toj pryčinŷ, že organizacija je registrovana jakraz na Slovakiji.

Do vidoma SKR zažene toto vŷhološiňa i prezidentci Slovac’koj republikŷ Zuzani Čaputovij, ministrovy zahraničnŷch dil i evropskŷch sprav Slovac’koj republikŷ Rastislavovy Kačerovy, a predsydateľci Evropskoj komisiji Ursuli fon der Lejen.

Podľa našŷch informacij členove Svitovoj radŷ Rusyniv za okremŷ deržavŷ proponujuť vŷhološiňa zahnaty i vlasťam svojich deržav.

Prynosyme vam cilŷj text vŷhološiňa, kotre je pidpysane predsedom Svitovoho kongresu Rusyniv Štefanom Ľavync’om, i kotre holosovaňom členiv per rollam schvalyla Svitova rada Rusyniv.

Vŷhološiňa Svitovoho kongresu Rusyniv

Svitovŷj kongres Rusyniv, jak holovna organizacija Rusyniv i rusyňskŷch organizacij na cilim sviti

vitať
pryjaťa zakona o narodnostnŷch menšŷnach Ver’chovnov radov Ukrajinŷ z dňa 13-ho decembra 2022-ho roku, jak jedno z uslovij pro vstup Ukrajinŷ do Evropskoj uniji i vŷražať nadiju, že nova legislativa dasť garanciji pro etničnŷj i kulturnŷj rozvytok všŷtkŷch narodnostnŷch menšŷn na Ukrajini, vkľučno Rusyniv, kotrŷm Ukrajina na tot čas menšŷnovŷ prava ne pryznavať,

vŷražať znepokojiňa
odnosno rezultativ razij publikovanŷch Službov bezpekŷ Ukrajinŷ z dňa 14-ho decembra 2022-ho roku, v ramkach kotrŷch bŷly konfiškovanŷ i artefaktŷ rusyňskoj kulturŷ, medži nyma bŷly rusyňskŷ spivankŷ, časopysŷ i rusyňska simbolika – flag i himna Rusyniv, kotrŷ bŷly neopravdano označenŷ jak dokazŷ diverziji pr’amovanŷ proty teritorialnoj cilosty Ukrajinŷ, i naperek tomu, že relevantnŷ rusyňskŷ organizaciji na Ukrajini i v inšŷch krajinach jednoznačno odsudyly vojnu, označily za agresora Rosijsku federaciju, i vŷrazyly solidarnosť z Ukrajinc’amy i všŷtkŷma dalšŷma narodnosťamy, kotrŷ žŷjuť na Ukrajini,

žadať predsedu vladŷ Slovac’koj republikŷ,
žebŷ Slovac’ka republika zvertajuči s’a do Ukrajinŷ i zvertajuči s’a do Evropskoj uniji

a) vŷzvala na bezodkladne zastavliňa perzekucij Rusyniv žŷjučich na Ukrajini,

b) žadala pryznaňa menšŷnovŷch narodnostnŷch prav pro Rusyniv žŷjučich na Ukrajini.

Pidpys: Dr. Štefan Ľavynec’, predseda SR SKR

Petro Medviď, avtor
 
žridlo: 
https://www.lem.fm/skr-zhadat-bezodkladne-zastavlinya-perzekutsij-rusiniv-na-ukrayini-zvertat-sya-do-slovatskoho-premyera/